Post News Media ព័ត៌មានសិល្បៈ និងកម្សាន្ត ម៉ាដូណា ធ្វើខ...

ម៉ាដូណា ធ្វើខួបលើកចុងក្រោយក្នុងជីវិត ថ្ងៃនេះ!

ចែកចាយបន្ត

នៅថ្ងៃទី២៦ មិថុនា នេះតារាកំប្លែងលោកម៉ាដូណា នឹងធ្វើខួបកំណើតគម្រប់៣៦ឆ្នាំដោយគ្រោងទទួលតារាសិល្ប:រហូតដល់៤០០នាក់នៅភោជនីយដ្ឋាន Happy Family ស្ថិតនៅកោះពេជ្រ។ យ៉ាងណាមិញ លោកថាពិធីនេះនឹងក្លាយជាពិធីខួបលើកចុងក្រោយតែមួយគត់នៅក្នុងជីវិត ដោយនឹងមិនមានពិធីខួបណាមួយត្រូវបានធ្វើឡើងទៀតទេ ដើម្បីកុំឲ្យអ្នកសិល្ប: និងភ្ញៀវកិត្តិយសធុញទ្រាន់ និងដើម្បីកុំឲ្យចំណាយលុយកាក់ខ្ជះខ្ជាយក្នុងការរៀបចំ។

លោកម៉ាដូណា និយាយថាហេតុផលដែលលោកសម្រេចធ្វើខួបជាទ្រង់ទ្រាយធំនៅក្នុងឆ្នាំនេះ គឺដោយសារតែលោកចង់ប្រកាសប្រាប់មិត្តភក្តិថាក្នុងពេលបន្តបន្ទាប់ លោកនឹងឈប់ធ្វើខូបបែបនេះទៀតហើយ ម្យ៉ាងមកពីលោកចង់យកឱកាសជួបជុំតារាសិល្ប: និងបងប្អូនផង ដែលខានមានពិធីយូរផង ទើបសម្រេចធ្វើដល់៤០តុតែម្ដង ដោយមិនទាន់រាប់តុដែលត្រូវត្រៀមទុកនៅឡើយ។ លោកថាពិធីខួបយប់នេះ លោកនឹងគ្រងនូវសម្លៀកបំពាក់ឲ្យដូចរាជិនីដោយក្រៅពីគ្រងឈុតប្លែកហើយក៏នឹងមានអមដោយម្កុដផងដែរ ដើម្បីឲ្យសមនឹងឈ្មោះ«រាជិនីកំពូលសម្រស់ម៉ាដូណា ស្រីតូចច្រឡឹងសេះសួគ៌» ដែលលោកបានប្រសិទ្ធនាមខ្លួនឯងនៅក្នុងសំបុត្រអញ្ជើញ។

នៅក្នុងពិធីនេះ លោកក៏ប្រកាសនឹងធ្វើឲ្យប្លែកផងដែរទាំងការរៀបចំ និងការរាំរែក ដើម្បីឲ្យពិធីបិទបញ្ចប់នៃខួបកំណើតរបស់ខ្លួនបន្សល់ទុកនូវអនុស្សាវរីយ៍ល្អៗក្រោយពេលឈប់ធ្វើ។ យ៉ាងណាមិញលោកអះអាងថាក្នុងពេលបន្តបន្ទាប់ បើទោះជាលោកមិនមានពិធីខួបកំណើតក៏នឹងមានពិធីជប់លៀងសប្បាយៗផ្សេងៗ ដូចជាឡើងផ្ទះ ឬបើកហាងនោះដែរ គឺមិនមែនអត់សោះនោះឡើយ។ លោកថាតារាកិត្តិយសនៅក្នុងថ្ងៃនេះនឹងតម្រូវឲ្យស្លៀកពាក់ប្លែកៗ ហើយតាមចំនួនដែលបានអញ្ចើញគឺក្នុងចំណោមភ្ញៀវទាំង៤០០ភ្ញៀវ គឺតារាសិល្ប:ចង់៨០ភាគរយទៅហើយ ទើបលោកយល់ថាពិធីដែលលោករៀបចំនឹងក្លាយជាជំនួបអ្នកសិល្ប:ទ្រង់ទ្រាយធំមួយ។ លោកមិនទាន់ដឹងថាចំនួនភ្ញៀវដែលបានអញ្ជើញនឹងមកគ្រប់គ្នា ឬយ៉ាងណានោះទេ ប៉ុន្តែផ្អែកតាមការស្រឡាញ់រាប់អាន លោកថាតារាភាគច្រើនកម្រចោលកម្មវិធីរបស់លោកខ្លាំងណាស់៕