Post News Media ព័ត៌មានអន្តរជាតិ កូរ៉េខាងត្បូង...

កូរ៉េខាងត្បូង-អាមេរិក នឹងធ្វើសមយុទ្ធដែនសមុទ្ររួមគ្នា នៅសប្ដាហ៍ក្រោយ

ចែកចាយបន្ត

កូរ៉េ: រដ្ឋាភិបាលក្រុងសេអ៊ូល ព្រមទាំងក្រុងវ៉ាស៊ីនតោន នឹងធ្វើសមយុទ្ធដែនសមុទ្ររួមគ្នា ក្បែរឧបទ្វីបកូរ៉េនៅសប្ដាហ៍ក្រោយ
ដោយមានវត្តមាននៃនាវាផ្ទុកយន្តហោះអាមេរិកមួយគ្រឿង។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី១៣ ខែតុលា ឆ្នាំ២០១៧។

តាមប្រព័ន្ធផ្សព្វផ្សាយក្នុងស្រុក បានដកស្រង់សម្តីមន្ត្រីកងជើងទឹករបស់កូរ៉េខាងត្បូង បាននិយាយថា «ការធ្វើសមយុទ្ធយោធារួមគ្នានៃប្រទេសទាំងពីរ នឹងត្រូវរៀបចំឡើងរយ:ពេល ៥ថ្ងៃ គឺចាប់ពីថ្ងៃច័ន្ទ ដល់ថ្ងៃសុក្រ នាសប្ដាហ៍ខាងមុខ នៅដែនទឹកភាគខាងកើត និងខាងលិចរបស់ប្រទេសកូរ៉េខាងត្បូង»។

ការចូលរួមសមយុទ្ធពីយោធាអាមេរិក មិនត្រឹមតែមាននាវាចម្បាំងដឹកយន្តហោះ USS Ronald Reagan ប៉ុណ្ណោះទេ ប៉ុន្តែក៏មានអមដោយនាវាពិឃាដ Aegis បំពាក់គ្រាប់មីស៊ីល នាវាមុជទឹកដើរដោយនុយក្លេអ៊ែរ និងនាវាពិឃាដ Sejong the Great Aegis របស់កូរ៉េខាងត្បូងទៀតផង។

សូមជំរាបថា សមយុទ្ធនេះ គឺជាប្រតិបត្តិការពិសេសរវាងកូរ៉េខាងត្បូង និងអាមេរិកនៅដែនសមុទ្រ ក្នុងគោលបំណងដើម្បីការពារការជ្រៀតជ្រែក ពីកងកម្លាំងពិសេសរបស់សត្រូវពួកគេ៕