Post News Media ព័ត៌មានសិល្បៈ និងកម្សាន្ត ផេនខេក ត្រៀមក...

ផេនខេក ត្រៀមកាត់សក់ខ្លី ដើម្បីការប្រពន្ធ

ចែកចាយបន្ត

យោងតាមការសារភាពតារាសម្ដែងភេទទី៣នាងផេនខេក នឹងត្រូវបង្ខំចិត្តកាត់សក់ខ្លី និងកែប្រែខ្លួនជាបុរសវិញឆាប់ៗ ដោយសារតែគ្រួសាររបស់នាងបានបង្ខំឲ្យនាងរៀបការប្រពន្ធបំពេញតួនាទីជាកូនប្រុស។ នាងថាខ្លួនមិនហ៊ានប្រឆាំងនឹងឪពុកម្ដាយទៀតទេ ដោយបានសន្យាថានឹងកាត់សក់ខ្លី ហើយចូលរោងការជាមួយនារីម្នាក់ដែលឪពុកម្ដាយនាងកំណត់ទុកក្នុងពេលឆាប់ៗ គឺអំឡុងក្រោយចូលឆ្នាំខ្មែរ។

កញ្ញាផេនខេក និយាយថា ឪពុកម្ដាយនាងបានស្ដីដណ្ដឹងនារីនៅខេត្តកំពង់ចាមម្នាក់ ដែលជាប់សាច់ឈាមផង ឲ្យនាងទៅរៀបការទុកធ្វើប្រពន្ធរួចហើយ ដោយនារីម្នាក់នោះក៏មិនប្រកាន់ថានាងជាបុរសភេទទី៣អ្វីនោះដែរ។ នាងនិយាយថាក្មេងស្រីនោះ ជាបងប្អូនផង ហើយក៏មានកម្រិតសិក្សាមិនខ្ពស់សូវនោះដែរ ទើបសម្រេចចិត្តទទួលយកការស្ដីដណ្ដឹងរបស់ឪពុកម្ដាយនាង និងបានសន្យារៀបការជាមួយគ្នានៅផុតរដូវវស្សាឆ្នាំក្រោយ។ កញ្ញាផេនខេកនិយាយថា«គាត់ឈប់ទុកពេលឲ្យខ្ញុំហើយ លូវខ្ញុំខ្ជិលប្រឆាំងគាត់ណាស់ កាត់សក់ខ្លីរៀបការតាមគាត់ទៅ ចាំរៀបការហើយនៅមិនកើតចាំលែងគ្នា!»។ នាងថាខ្លួននឹងរៀបការឲ្យឪពុកម្ដាយសប្បាយចិត្ត ប៉ុន្តែនាងមិនច្បាស់រឿងអាចបំពេញការងារជាប្ដីម្នាក់ដូចគ្នានឹងបុរសទូទៅនោះទេ ដោយនាងបានប្រាប់មិនលាក់បាំងថា អត់មានអារម្មណ៍ជាមួយស្ត្រី និងថាខ្លួនចង់បានតែប្ដីប៉ុណ្ណោះ។ នាងថាធ្លាប់ប្រាប់ឪពុកម្ដាយពីរឿងអត់ស្រឡាញ់ស្រីច្រើនលើកមកហើយ ប៉ុន្តែមកពីឪពុកម្ដាយរបស់នាងគំរាមកាត់កាល ហើយនាងក៏មិនចង់បន្តធ្វើជាកូនអកត្តញ្ញូផង ទើបសម្រេចចិត្តប្រកាសកាត់សក់ខ្លី ហើយចូលរោងការជាមួយនារីម្នាក់។ នាងនិយាយថា«រឿងអីគេមិនយកបង បើក្មេងហ្នឹងក្មេងស្រុកស្រែហ្នឹង ហើយអត់ដឹងពុកម៉ែខ្ញុំនិយាយយ៉ាងមិចជាមួយខ្លះ ទើបគាត់ និងក្រុមគ្រួសារថាឲ្យយកខ្ញុំធ្វើប្ដី!»។ នាងថាតារាសិល្ប:ច្រើននាក់ដែលដឹងរឿងនេះ សុទ្ធតែបានសើចចំអក ប៉ុន្តែនាងថាមិនមែនជារឿងត្រូវសើចទេ ដោយសារតែនាងពិតជារងសម្ពាធរបស់គ្រួសារ ហើយធ្ងន់ធ្ងរមិនអាចបន្តគេចបាននោះផង សម្រាប់ជីវិតអាពាហ៍ពិពាហ៍៕

ចែកចាយបន្ត