Post News Media ព័ត៌មានសិល្បៈ និងកម្សាន្ត សុគន្ធ ដេវីដ ...

សុគន្ធ ដេវីដ បំបែកឯកត្តកម្មលើYoutube គួរឲ្យភ្ញាក់ផ្អើល

ចែកចាយបន្ត

មានការភ្ញាក់ផ្អើលមិនតិចនោះទេ ក្នុងពេលដែលតារាចម្រៀងលោកសុគន្ធ ដេវីដ បានក្លាយជាតារាចម្រៀងនាំមុខមិនគួរជឿ ដោយសារតែបទ«សង្សារខ្ញុំចរឹតបាន»របស់លោកមានអ្នកចូលទស្សនារហូតដល់ជាង៧៨លានដងមិនធ្លាប់មាននៅបណ្ដាញYoutube ។ សុគន្ធ ដេវីដ បានសម្ដែងការសោកស្ដាយដែលបទមួយនេះ ត្រូវបានកន្ទ្រាក់ការចាប់អារម្មណ៍ពីសំណាក់អ្នកចូលចិត្តទស្សនាបទចម្រៀងលើ Youtube ប៉ុន្តែគឺជាបទដែលត្រូវបានបិទចោលដោយក្រសួងវប្បធម៌ ដោយសារតែបទនេះត្រូវបានក្រសួងចោទថាមានអត្តន័យ និងសាច់រឿងមាក់ងាយដល់នារីខ្មែរ។

លោកសុគន្ធ ដេវីដ បានអះអាងថាខ្លួនមានអារម្មណ៍សប្បាយចិត្តយ៉ាងខ្លាំង បន្ទាប់ពីបានមានការចុះផ្សាយបទចម្រៀងមួយបទរបស់លោកក្រោមចំណងជើងថា«សង្សារខ្ញុំចរឹតបាន» មានអ្នកទស្សនាដល់ទៅជាង៧៨លានដងជាលើកដំបូង ដែលអាចចាត់ទុកថាជាបទដែលមានអ្នកទស្សនាច្រើនជាងគេ ក្នុងចំណោមបទខ្មែរនៅលើYoutube ។ បើទោះជាបទនេះ ជាបទចម្លងពីបរទេស ប៉ុន្តែលោកសុគន្ធ ដេវីដ បានចាត់ទុកជាមោទនភាពមួយរបស់ខ្លួនដែលបទមួយនេះក្រុមការងាររបស់ផលិតកម្មនេត្រាយកច្នៃឲ្យលោក ហើយក្រោយការបង្ហោះក៏មានអ្នកចូលទស្សនាមិនគួរឲ្យជឿដល់ជាង៧៨លានដងគិតត្រឹមយប់ថ្ងៃទី២៧ មីនា។ លោកថាចំនួនអ្នកទស្សនាដ៏លើសលប់នេះ គឺ ត្រឹមតែនៅលើYoutube ប៉ុណ្ណោះ ដោយមិនទាន់បានគិតបញ្ចូលនូវផេកផ្សេងទៀតដែលយកបទនេះទៅបង្ហោះ ហើយមានអ្នកចូលទស្សនារង្វង់ពី១០លាន ទៅ២៥លានដងនោះផង។ លោកថានេះជាបទដែលលោកស្រឡាញ់ ហើយបើទោះជាក្រោយចេញផ្សាយមានការរិះគន់ ប៉ុន្តែលោកក៏មានគេស្គាល់ច្រើនឡើងព្រោះតែចម្រៀងមួយបទនេះដែរ។

ផ្អែកតាមចំនួនអ្នកចូលទស្សនាដ៏លើសលប់នេះ បានរុញឲ្យលោក សុគន្ធ ដេវីដ បានក្លាយជាតារារបស់ប្រទេសកម្ពុជាតែម្នាក់គត់ ដែលនាំមុខគេនៅលើ Youtube ដោយសារតែមានរបស់លោកកន្ទ្រាក់អ្នកទស្សនាក្នុងចំនួនមួយខ្ពស់នៅលើពិភពលោក។ នេះជាតួលេខដែលគេកម្រឃើញ ខណ:ដែលតួលេខនេះ នៅតែបន្តកើនឡើងជារឿងរាល់ថ្ងៃម៉ោង ដោយអាចនឹងនាំមុខនឹងបទចម្រៀងរបស់តារាល្បីៗនៅក្រៅប្រទេសមួយចំនួននោះផង។ លោក សុគន្ធ ដេវីដ និយាយថាបើបទនេះមិនមានប្រតិកម្មនៅក្នុងប្រទេស គឺពិតជាល្អ។ យ៉ាងណាមិញ លោកក៏សប្បាយចិត្តដែរដែលទឹកដមសំឡេងរបស់លោក និងមុខមាត់របស់លោក ត្រូវបានគេស្គាល់កាន់តែច្រើននៅលើYoutube ដោយសារតែបទ«សង្សារខ្ញុំចរឹតបាន»មានអ្នកទស្សនាដល់ច្រើនលានដងដែលលោកមិនធ្លាប់ស្រម៉ៃ។ លោកសារភាពថាក្រោយភ្លៀងមេឃស្រឡះ ដោយសារតែក្រោយប្រតិកម្មជាមួយនឹងសាច់រឿងនៅក្នុងបទនោះ ក៏ធ្វើឲ្យទីផ្សាររបស់លោកកំរើកឡើង នាពេលចុងក្រោយ៕

ចែកចាយបន្ត