Post News Media ព័ត៌មានសិល្បៈ និងកម្សាន្ត សល់ពេលពីសិល្ប...

សល់ពេលពីសិល្ប: តារាសំឡេង២ ផាឌីន ធ្វើជ្រក់ជើងមាន់រកចំណូល!

ចែកចាយបន្ត

ខុសពីតារាភាគច្រើនដែលឈរឈ្មោះលក់ជ្រក់ជើងមាន់ឲ្យបងប្អូន ឬដៃគូរបស់ខ្លួន តារាចម្រៀងសំឡេង២លោកដួង តារាផាឌីន ហៅផាឌីន បានបញ្ចេញថ្វីដៃធ្វើជ្រក់ជើងមាន់រសជាតិពិសេសដោយដៃផ្ទាល់ខ្លួនតែម្ដងដើម្បីរកកម្រៃ។ នេះជាមុខរបរបន្ថែមពីការច្រៀងរាំរបស់លោក បន្ទាប់ពីលោកមានបំណងចង់បើកអាជីវកម្មក្រៅពីសិល្ប:ធំដុំនឹងគេដែរ តែមិនមានលទ្ធភាពគ្រប់គ្រាន់។

លោកផាឌីន និយាយថាលោកមិនខ្មាស់រឿងអ្នកណាថាតារាប្រុសធ្វើជ្រក់ជើងមាន់ដាក់លក់មិនបាននោះទេ ប៉ុន្តែអ្វីដែលលោកសប្បាយចិត្តគឺមានអតិថិជនដែលបានភ្លក់ជ្រក់ជើងមាន់របស់លោកសុទ្ធតែបង្កើនការកុម្ម៉ង់ និងកោតសរសើរថាជ្រក់ជើងមាន់របស់លោកមានរសជាតិឆ្ងាញ់ ហើយមិនភ័យរឿងមានជាតិគីមីប៉ះពាល់ដល់សុខភាព។ លោកទើបតែចាប់ផ្ដើមលើមុខរបរនេះក្រោយពេលសម្លឹងឃើញទីផ្សារជ្រក់ជើងមាន់មានការចាប់អារម្មណ៍ប៉ុណ្ណោះ តែបានយល់ឃើញថានេះជាមុខរបរត្រូវនឹងចំណូលចិត្ត ហើយទទួលបានចំណូលស្រួលភ្លាមៗ ដោយសារតែជ្រក់ជើងមាន់គ្រាន់តែបានធ្វើហើយ មិនទាន់ទាំងបានបង្ហោះដាក់លក់ផង មានការកុម្ម៉ង់ទិញពីអ្នកជិតខាង និងអ្នកស្គាល់លោកធ្វើឲ្យលោកមិនស្ដាយកម្លាំង។

លោកថាការងាររបស់អ្នកសិល្ប:បើមិនចេះកែច្នៃគឺនឹងមានហានិភ័យនៅពេលបន្តិចទៀត អ៊ីចឹងហើយទើបក្នុងខែវស្សាដែលការងារច្រៀងអាហ្វែ និងសម្ដែងរបស់លោកធ្លាក់ចុះ គឺលោកត្រូវតែបែកគំនិតយកពេលមកធ្វើអ្វីផ្សេងដើម្បីឲ្យបានកម្រៃ ដោយលោកយល់ថាគឺមានតែមានមុខរបរធ្វើជ្រក់ជើងមាន់នេះឯង ដែលជួយឲ្យលោកមិនខ្វល់រឿងចំណាយដើមច្រើន ហើយដឹងតែបានលុយចូលមកវិញតែម្ដង ដ្បិតថាជាមុខរបរហត់បន្តិច ហើយមិនសូវលើកមុខលោកដែលជាតារាចម្រៀង និងជាតារាសម្ដែងម្នាក់។

លោកផាឌីន និយាយថាជ្រក់ជើងមាន់របស់លោកត្រូវបានវិចខ្ចប់ក្នុងកែវទម្ងន់២គីឡូ ហើយបានដាក់លក់ក្នុងតម្លៃ៤ម៉ឺនរៀលក្នុងមួយកែវ ដោយក្រោយពេលធ្វើរួចគឺមិនមានជ្រក់ជើងមាន់ណាមួយត្រូវបាននៅសល់នោះទេ ដោយសារតែការកុម្ម៉ង់។ ក្នុងពេលខាងមុខលោកគ្រោងពង្រីកបណ្ដាញចែកចាយលើមុខរបរនេះ តែសម្រាប់ថ្វីដៃគឺលោកនៅតែអះអាងថានឹងធ្វើដោយផ្ទាល់ដៃដោយគ្មានគម្រោងប្រគល់ឲ្យអ្នកណាម្នាក់ជាអ្នកធ្វើជំនួសនោះទេ ដើម្បីកុំឲ្យអតិថិជនដែលភ្លក់រសជាតិជ្រក់ជើងមាន់របស់លោកឆ្ងាញ់ ហើយក្រោយទទួលទានជ្រក់ជើងមាន់លើកក្រោយដែលច្នៃដោយក្រុមការងាររបស់លោកវិញ បែរជាមានការប្រែប្រួលរសជាតិ។ លោកនឹងបង្កើនតែក្រុមការងារលើការ វិចខ្ចប់ និងទទួលការកុម្ម៉ង់ប៉ុណ្ណោះ ចំណែកការផ្សំគ្រឿង និងការកែច្នៃរសជាតិគឺលោកនឹងធ្វើដោយដៃរបស់ខ្លួនទាំងអស់ បើទោះជាពេលខាងមុខលោកការងារច្រៀង និងសម្ដែងរបស់លោកនឹងមមាញឹកជាថ្មីដែលធ្វើឲ្យលោកពិបាកចំណាយពេលធ្វើជ្រក់ជើងមានបានពេញដៃពេញជើងបែបនេះ៕