Post News Media ព័ត៌មានសិល្បៈ និងកម្សាន្ត ស្វែង សុជាតា ...

ស្វែង សុជាតា និយាយពីគាំ ចន្ធី ក្រោយការផ្ទុះជម្លោះ

ចែកចាយបន្ត

បន្ទាប់ពីលោកគាំ ចន្ធី ដែលត្រូវគេស្គាល់ថាជាផលិតករល្បីឈ្មោះនៅក្នុងពិភពសិល្ប:បានផ្ទុះជម្លោះជាមួយតារាសម្ដែងកញ្ញា ឌុច លីដា រហូតធ្វើឲ្យមានការលើកឡើងពីតារាសិល្ប:នៅលើហ្វេសប៊ុកដើម្បីកាន់ជើងភាគីម្ខាងៗនោះ តារាសម្ដែងអ្នកនាងស្វែង សុជាតា ដែលជាតារាល្បីឈ្មោះម្នាក់ ក៏បានចេញមុខលើកឡើងពីបញ្ហានេះផងដែរ។

យ៉ាងណាមិញអ្នកនាងបានបដិសេធថាមិនលូកដៃក្នុងជម្លោះរបស់គាំ ចន្ធី និងកញ្ញា ឌុច លីដា នោះទេ គឺគ្រាន់តែនិយាយត្រង់ៗពីអ្វីដែលអ្នកនាងបានដឹងប៉ុណ្ណោះ។

អ្នកនាងនិយាយថា សម្រាប់អ្នកណាយល់អ្វីគឺអ្នកនាងមិនដឹងនោះទេ ប៉ុន្តែសម្រាប់ការងារដែលអ្នកនាងធ្លាប់ធ្វើជាមួយ លោក គាំ ចន្ធី គឺអ្នកនាងមិនដែលជួបប្រទះនូវផលរម៉ាស់នោះទេ។ អ្នកនាងថាលោករមែងបែងចែកការងារច្បាស់រាល់ពេលចេញថតម្ដង ដោយលោកច្បាស់លាស់បំផុតរឿងកាលបរិច្ឆេទ និងប្លង់ចេញថតជាដើម ដោយអ្នកនាងបញ្ជាក់ថាសម្រាប់ការផលិតកុនរបស់លោកគឺអ្នកនាងសរសើរថាច្បាស់លាស់។

អ្នកនាងថាលោក គាំ ចន្ធី មិនដែលមានបញ្ហារឿងលុយកាក់ជាមួយតួសម្ដែងនោះទេ ដោយលោកមានតែផ្ដល់ការយោគយល់បើកឲ្យតួមុនថ្ងៃជាពិសេសចំពោះអ្នកនាងនៅពេលដែលនាងមានបញ្ហាលុយកាក់កើតឡើង។ អ្នកនាងថាក្នុងចំណោមផលិតករដែលអ្នកនាងធ្លាប់ថតជាមួយ គឺអ្នកនាងយល់ថាផលិតកររូបនេះរៀងកាចមាត់ឆៅ ក្នុងពេលតួសម្ដែងមកយឺតខ្លាំង ឬធ្វើការមិនសូវច្បាស់លាស់ ប៉ុន្តែសម្រាប់ទឹកចិត្តគឺលោកមិនខុសពីឪពុកម្ដាយរបស់តួសម្ដែងនោះទេ ដោយសារតែលោកយោគយល់ច្រើនជាងដាក់បន្ទុកទៅលើតួសម្ដែង។

អ្នកនាងបានថតរឿងឲ្យលោកគាំ ចន្ធី មិនក្រោម២០រឿងនោះក្នុងចំណោមភាពយន្តដែលលោកផលិតចំនួនជាង៣០រឿងនាពេលកន្លងមក។ អ្នកនាងថាអ្វីដែលអ្នកនាងនឹកគុណមិនដែលភ្លេច គឺលោករមែងផ្ដល់ពេលវេលាយោគយល់ឲ្យតារា ជាពិសេសគឺអ្នកនាងផ្ទាល់តែម្ដង នៅពេលដែលអ្នកនាងជាប់ថត ឬជាប់រកស៊ីមួយកន្លែងផ្សេងទៀត ដើម្បីឲ្យកូនចៅបានលុយចាយ។

អ្នកនាងនិយាយថា«ក្នុងចំណោមផលិតករ ខ្ញុំហ៊ាននិយាយថាលោកគាំ ចន្ធី ល្អណាស់ ពេលកូនចៅជាប់ថតកន្លែងផ្សេង គាត់សេរេថ្ងៃឲ្យរហូត គាត់អាណិតយើងចង់ឲ្យយើងបានថតច្រើនឲ្យបានលុយចាយ!»។ អ្នកនាងនិយាយថាបើអ្នកណាថាលោក គាំ ចន្ធី មិនល្អ អាក្រក់ដាក់តួ គឺអ្នកនាងសុំបដិសេធតែម្ដង ដោយសារតែផលិតករដែលអ្នកនាងធ្លាប់ធ្វើការជាមួយខ្លះ គឺកុំថាឡើងយឺតដល់២ម៉ោងត្រឹមតែកន្លះម៉ោងក៏កាត់លុយ ឬស្ដីឲ្យដែរ ហើយបើនិយាយរឿងរវល់ឲ្យតែប្រាប់គឺលោកមហាយោគយល់ លើកតែតួនោះយឺតជាទម្លាប់ ហើយឈានដល់បោកគ្រាប់បោកបែកមិនមកថត ធ្វើឲ្យប៉ះពាល់ដល់ការផលិត។

អ្នកនាងនៅតែនិយាយថាមិនកាន់ជើងលោក គាំ ចន្ធី នោះទេ ប៉ុន្តែបើមានអ្នកនិយាយថាលោកជាផលិតករពិបាកធ្វើការ ខ្វះការយោគយល់ និងមិនច្បាស់លាស់រឿងការងារផលិតរឿងគឺអ្នកនាងសុំបដិសេធ ដោយសារតែអ្នកនាងធ្លាប់ការជាមួយលោកច្រើនឆ្នាំ គឺមិនធ្លាប់ប្រទះនូវបញ្ហាដែលអ្នកខ្លះចោទប្រកាន់។ អ្នកនាងថាផលិតករណាក៏មិនខុសពីផលិតកម្មណានោះ គឺត្រូវតែកាច ត្រូវតែម៉ត់ចត់ ប៉ុន្តែបើនិយាយពីការយោគយល់គឺអ្នកនាងបញ្ជាក់ថាលោក គាំ ចន្ធី គឺមានអធ្យាស្រ័យច្រើនណាស់ចំពោះតួសម្ដែង។

ពាក់ព័ន្ធនឹងការលើកឡើងនេះ តារាសម្ដែងមួយចំនួនផ្សេងទៀត ដែលបានធ្វើការជាមួយលោក ក៏ធ្លាប់លើកឡើងមិនខុសគ្នាផងដែរ បើទោះជាមានតារាមួយចំនួនដែលកាន់ជើង ឌុច លីដា និយាយថាអាចបណ្ដាលមកពីលោកមានបញ្ហាទើបធ្វើឲ្យឌុច លីដា លែងចរឹកដាក់រហូតបង្កជាទំនាស់៕