Post News Media ព័ត៌មានជាតិ ប្ដីប្រពន្ធពី...

ប្ដីប្រពន្ធពីរនាក់ ជិះម៉ូតូទៅប្ដឹងប៉ូលិស ក្រោយចោរចូលគាស់ផ្ទះ

ចែកចាយបន្ត

ភ្នំពេញ: ភ្នាក់ងារ Post News បានរាយការណ៍មកថា មានប្ដីប្រពន្ធពីរនាក់ បានជិះម៉ូតូ១គ្រឿង ឌុបគ្នាធ្វើដំណើរទៅកាន់ ប៉ុស្ដិ៍នគរបាលចោមចៅ ដោយរួមជាមួយរទេះរុញ១គ្រឿង និងសម្ភារ:គាស់ផ្ទះមួយចំនួន ព្រមទាំងថ្នាំបំពុលឆ្កែ១ថង់ ទៅជាមួយផង បន្ទាប់ត្រូវបានចោរគាស់ផ្ទះ ហើយពួកគាត់ ក៏បានទៅដាក់ពាក្យបណ្ដឹង សុំឲ្យនគរបាលជួយ អន្តរាគមន៏កាលពីវេលាម៉ោង១០ព្រឹក ថ្ងៃទី២៦ ខែមិនា ឆ្នាំ២០១៧។

តាមប្រភពសមត្ថកិច្ច បានឲ្យដឹងថា បុរសជាប្ដីឈ្មោះ ងួន ចាន់ឫទ្ធី អាយុ៣៥ឆ្នាំ មុខរបរជាមន្ត្រីយោធា និងស្ត្រី ជាប្រពន្ធឈ្មោះ ស្រុន ចាន់ធឿន មុខរបរលក់ចាបហួយ មានទីលំនៅក្នុងភូមិ ថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ដោយឡែកទ្រព្យសម្បត្តិ មិនមានការបាត់បង់អ្វីទាំងអស់ ព្រោះចោរទើបចូលទៅដល់ ក៏ត្រូវពួកគាត់ឃើញទាន់ ធ្វើឲ្យក្រុមចោរនាំគ្នារត់ផាសក្រញ៉ាំតែម្ដង។

ប្ដីប្រពន្ធខាងលើ បាននិយាយប្រាប់នគរបាលថា កាលពីវេលាម៉ោង២ យប់រំលងអាធ្រាត្រ ឈានចូលថ្ងៃទី២៦ ខែមីនា មានចោរ១ក្រុម បានចូលទៅក្នុងបរិវេណផ្ទះ របស់ពួកគាត់ ហើយបានធ្វើសកម្មភាព វាយបំបែកអំពូលភ្លើង ដែលដាក់បំភ្លឺ នៅខាងក្នុងបរិវេណផ្ទះនោះ បម្រុងធ្វើសកម្មភាពគាស់ផ្ទះ លួចទ្រព្រសម្បត្តិនៅក្នុងផ្ទះពួកគាត់ ។ ប៉ុន្តែចៃដន្យនៅពេលនោះ មេឃជិតធ្លាក់ភ្លៀងពួកគាត់ មានការព្រួយបារម្ភខ្លាចភ្លៀងទទឹក ស៊ីម៉ងត៌ និងសម្ភារ:សំណង់ ដែលប្អូនគាត់កំពុងសាងសង់ផ្ទះ ហើយទុកនៅជិតផ្ទះនោះដែរ ក៏នាំគ្នាចុះទៅពិនិត្យមើល ស្រាប់តែឃើញ ក្រុមចោរកំពុងចូលធ្វើសកម្មភាព ដោយឡែកចោរវិញ ខណ:បានឃើញគាត់ ក៏បាននាំគ្នារត់គេចខ្លួនយ៉ាង ទាន់ហន់បំផុត ចោលសាច់គោប្រឡាក់ដោយថ្នាំបំពុលឆ្កែ ១ថង់ រួមជាមួយរទេះរុញ១គ្រឿង និងកាំបិតមួយ ព្រមទាំងសម្ភារ: មួយចំនួន។

លុះព្រឹកឡើងដោយមានការព្រួយបារម្ភពីសុវត្ថិភាព ទើបពួកគាត់ សម្រេចចិត្តដាក់ពាក្យបណ្ដឹង សុំឲ្យនគរបាលជួយអន្តរាគមន៍ ដើម្បីជួយធ្វើការស្រាវជ្រាវរកមុខសញ្ញាចោរ៕

ចែកចាយបន្ត