Post News Media ព័ត៌មានជាតិ ឡិចស៊ីសបុក ម៉...

ឡិចស៊ីសបុក ម៉ូតូសេ១២៥ ប៉ើងធ្លាក់ពីលើផ្លូវខ្ទាតមនុស្សម្នាក់ស្លាប់ និងចាស់ក្មេង៣នាក់ទៀតរបួសធ្ងន់

ចែកចាយបន្ត

បន្ទាយមានជ័យ: លោកមេប៉ុស្ដិ៍ស្នៀត បានប្រាប់ Post News ថា មានករណីគ្រោះថ្នាក់ចរាចរណ៍មួយ រវាងរថយន្ដ ឡិចស៊ីស បុកជាមួយម៉ូតូសេ ១២៥ បណ្ដាលឲ្យ ប៉ើងធ្លាក់ទាំងម៉ូតូនិងរថយន្ដ ពីលើផ្លូវ បណ្ដាលឲ្យមនុស្សចាស់ក្មេងប្រុសស្រី ៤នាក់ ស្លាប់និងរបួសធ្ងន់។

ហេតុការណ៍នេះបានកើតឡើង កាលពីវេលាម៉ោង ១ និង ៥០នាទី រសៀល ថ្ងៃទី ២៧ ខែមីនា ឆ្នាំ២០១៧ ស្ថិតនៅចំណុចស្ពានទី៦ ផ្លូវជាតិលេខ ៦ ភូមិស្នៀត សង្កាត់ស្នៀត ក្រុងសេរីសោភ័ណ ខេត្តបន្ទាយមានជ័យ ។

លោកនាយប៉ុស្ដិ៍ស្នៀត បានបន្ដថា គ្រោះថ្នាក់ចរាចរណ៍នេះ កើតឡើងរវាង រថយន្ដម៉ាកឡិចស៊ីស ពណ៌ស្ករ ពាក់ស្លាកលេខ ភ្នំពេញ 2P-3808 បើកបរក្នុងទិសដៅពីកើតទៅលិច តាមបណ្ដោយផ្លូវខាងលើ លុះបានមកដល់ចំណុចកើតហេតុ បានបុកជាមួយម៉ូតូ សេ ១២៥ ពណ៌ខ្មៅ ស៊េរីឆ្នាំ ២០១៣ ពាក់ស្លាកលេខ បន្ទាយមានជ័យ 1E-1365 ជិះឌុបគ្នា ៤នាក់ ក្នុងនោះមាន បុរសម្នាក់ ឈ្មោះ ផល បូត អាយុ ៥៧ ឆ្នាំ ស្នាក់នៅ ភូមិបុស្បូវ ឃុំបុស្បូវ ស្រុកព្រះនេត្រព្រះ បានស្លាប់នៅនឹងកន្លែងកើតហេតុ ចំណែកមនុស្សស្រីចាស់ក្មេង ៣នាក់ទៀត រងរបួសយ៉ាងធ្ងន់ធ្ងរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

បច្ចុប្បន្នមធ្យោបាយធ្វើដំណើរទាំង២គ្រឿង ត្រូវបានសមត្ថកិច្ចធ្វើការវាស់វែង យកទៅរក្សាទុក រង់ចាំដោះស្រាយគ្នាពេលក្រោយតាមផ្លូវច្បាប់ ។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារធ្វើបុណ្យតាមប្រពៃណី ៕