Post News Media ព័ត៌មានបច្ចេកវិទ្យា ក្រុមហ៊ុន Ube...

ក្រុមហ៊ុន Uber កំពុងធ្វើតេស្តរថយន្តបើកបរស្វ័យប្រវត្តិ ស្រាប់តែជួបគ្រោះថ្នាក់ចៃដន្យមួយ

ចែកចាយបន្ត

Uber ដែលជាក្រុមហ៊ុនបច្ចេកវិជ្ជាបង្កើតប្រព័ន្ធកម្មវិធីគ្រប់គ្រងដំណើរការរថយន្ត បានផ្អាកដំណើរការរថយន្តស្វ័យបើកបរសាកល្បងរបស់ខ្លួនភ្លាមៗ ក្រោយពីកើតមានករណីរថយន្តបំពាក់ប្រព័ន្ធស្វ័យប្រវត្តិកម្មររបស់ខ្លួនមួយគ្រឿង ជួបគ្រោះថ្នាក់ចរាចរណ៍។

បើតាមសម្តីក្រុមហ៊ុន Uber ថ្លែងកាលពីថ្ងៃសុក្រ បានឱ្យដឹងថា រថយន្តប្រាំកៅអីម៉ាក Volvo ដែលបំពាក់ប្រព័ន្ធស្វ័យបើកបររបស់ខ្លួន បាននឹងកំពុងស្ថិតក្នុងការបើកបរដោយឯកឯង មុនពេលប៉ះទង្គិច តែមិនបានបង្ករបួសស្នាមដល់នរណាម្នាក់ឡើយ។

តាមរូបថតបង្ហាញខាងលើ រថយន្ត Volvo មួយគ្រឿងនោះ គឺស្ថិតនៅខាងស្តាំផ្លូវមួយខ្សែក្នុងរដ្ឋ​ Arizona ជាប់នឹងរថយន្តមួយគ្រឿងផ្សេងទៀតដែលរងការខូចខាតយ៉ាងតំណំ។

យោងតាមសម្តីលោកស្រី Josie Montenegro អ្នកនាំពាក្យរបស់សមត្ថកិច្ចប្រចាំក្រុង Tempe នៃរដ្ឋ Arizona បានឲ្យដឹងថា គ្រោះថ្នាក់នេះបានកើតឡើង ខណ:ដែលរថយន្តមួយគ្រឿងផ្សេងទៀតបានបើកជ្រុលជង្កូតទៅប៉ះរថយន្ត Volvo ដែលកំពុងតែបត់ឆ្វេង។

លោកស្រីបានបន្ថែមថា មុខពេលកើតហេតុ គឺមានមនុស្សម្នាក់ឋិតក្នុងរថយន្ត ប៉ុន្តែ មិនទាន់ប្រាកដថា គេកំពុងបញ្ជាលើរថយន្តខណ:កើតមានគ្រោះថ្នាក់នោះ ឬយ៉ាងណាទេ។

ជាធម្មតា រថយន្តបំពាក់ប្រព័ន្ធស្វ័យបើកបររបស់ក្រុមហ៊ុន Uber តែងដាក់មនុស្សម្នាក់អង្គុយនៅកៅអីតៃកុង ដើម្បីគ្រប់គ្រងរថយន្ត និងបញ្ជៀសឧប្បត្តិវហេតុចៃដន្យណាមួយ បើទោះជាវាអាចបើកបរបានដោយខ្លួនឯងក៏ដោយ។

នេះជាលើកទីមួយហើយ​ដែល Uber បានបញ្ឈប់ដំណើរការរថយន្តស្វ័យបើកបររបស់ខ្លួនពីដងផ្លូវក្នុងរដ្ឋ Arizona បន្ទាប់ពីការធ្វើការតេស្តក្នុងរដ្ឋ Pennsylvania និង California រួចរាល់។ រដ្ឋទាំង ៣ នេះត្រូវបានក្រុមហ៊ុនជ្រើសរើសជាទីកន្លែងសម្រាប់សាកល្បងរថយន្តបើកបរដោយខ្លួនឯង៕

ប្រភពព័ត៌មាន៖ bbc.com

 

ចែកចាយបន្ត