Post News Media ព័ត៌មានជាតិ Update៖ រថយន្...

Update៖ រថយន្តឡង់គ្រឺស័រ បើកលឿនបុកអ្នកជិះម៉ូតូរបួសធ្ងន់២នាក់លើផ្លូវជាតិលេខ៤

ចែកចាយបន្ត

ភ្នំពេញ: យុវជន២នាក់បានរងរបួសធ្ងន់ធ្ងរ និងត្រូវបានគេបញ្ជូនទៅសង្គ្រោះបន្ទាន់ភ្លាមៗ ខណ:ពេលកំពុងជិះម៉ូតូ១គ្រឿងឌុបគ្នាសុខៗ ក៏ត្រូវរថយន្តម៉ាកឡង់គ្រឺស័រ១គ្រឿង បើកបរក្នុងល្បឿនយ៉ាងលឿន ក្នុងទិសដៅបញ្ច្រាសទិសគ្នាជែង រថយន្តកុងតឺន័រ ដែលកំពុងបើកនៅខាងមុខ ក៏បានជ្រុលទៅបុកជនរងគ្រោះពេញទំហឹង ហើយបើករត់គេចបាត់ស្រមោលតែម្តង។

គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៤ និង៣០នាទីរសៀល ថ្ងៃទី២៨ ខែមីនា ឆ្នាំ២០១៧ នៅលើកំណាត់ផ្លូវជាតិលេខ៤ ក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

យុវជនរងគ្រោះទាំង២នាក់នោះ មិនត្រូវបានគេស្គាល់ឈ្មោះនោះឡើយ មានអាយុប្រហែ១៨ទៅ២០ឆ្នាំ ជិះម៉ូតូ១គ្រឿងម៉ាកហុងដាស្កុបពី ពណ៌ខ្មៅ ពាក់ស្លាកលេខភ្នំពេញ 1CR-2687 ចំណែករថយន្តបង្កជាប្រភេទរថយន្តម៉ាកឡង់គ្រឺស័រ ចង្កូតស្ដាំ ពណ៌សំបកឪឡឹក ត្រូវជនរងគ្រោះសម្លឹងឃើញពាក់ស្លាកលេខមួយភ្លែតគឺ ភ្នំពេញ 3716 ជិះ២នាក់ប្ដីប្រពន្ធ និងបានបើករត់គេចបាត់ ស្រមោលតែម្ដង។

ប្រជាពលរដ្ឋបាននិយាយថា នៅមុនពេលកើតហេតុ គាត់បានឃើញ ជនរងគ្រោះទាំង២នាក់នោះ ជិះម៉ូតូឌុបគ្នាក្នុងទិសដៅពីលិចទៅកើត លុះពេលធ្វើដំណើរទៅដល់ត្រង់ចំណុចកើតហេតុនោះ ស្រាប់តែរថយន្តបង្ក បើកបរក្នុងទិសដៅបញ្ច្រាសទិសគ្នាពីកើតទៅលិច ក្នុងល្បឿនយ៉ាងលឿន និងបានជែងរថយន្តកុងតឺន័រ១គ្រឿងទៀត ដែលកំពុងបើកបរនៅខាងមុខ ជ្រុលទៅបុកម៉ូតូជនរងគ្រោះ ពេញទំហឹង បណ្ដាលឲ្យដួលបោកទៅលើថ្នល់ រងរបួសធ្ងន់ទាំង២នាក់តែម្ដង។

ក្រោយពេលកើតហេតុ ជនរងគ្រោះ ត្រូវបានគេបញ្ជូនទៅសង្គ្រោះបន្ទាន់ នៅឯមន្ទីរពេទ្យ។ ចំណែកឯរថយន្តបង្កភ្លាមៗនោះ បានបន្ថយល្បឿនដែរ ប៉ុន្តែពេលឃើញជនរងគ្រោះមានរបួស ក៏បានបើករត់គេចបាត់ដោយសុវត្ថិភាព៕

ចែកចាយបន្ត