Post News Media ព័ត៌មានជាតិ រថយន្តព្រុសបុ...

រថយន្តព្រុសបុករះម៉ូតូ២គ្រឿងពីក្រោយពេញទំហឹង បណ្តាលឲ្យស្ត្រីម្នាក់រងរបួសធ្ងន់

ចែកចាយបន្ត

ភ្នំពេញ: រថយន្តម៉ាកព្រុស១គ្រឿងជ្រុលទៅបុករះម៉ូតូ២គ្រឿងពីក្រោយយ៉ាងពេញទំហឹង បណ្ដាលឲ្យស្ត្រីម្នាក់បែកមាត់ បាក់ធ្មេញ និងពកក្បាលរងរបួសយ៉ាងធ្ងន់ធ្ងរ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០ និង៣០នាទី ព្រឹកថ្ងៃទី ២៦ ខែមេសា ឆ្នាំ ២០១៧ នៅជំណុចមុខផ្ទះលេខ ១២២៨ ផ្លូវជាតិលេខ២ ភូមិព្រែកតាគង់ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ស្ត្រីរងគ្រោះមានឈ្មោះ នួយ គន្ធា អាយុ ៣៦ឆ្នាំ មានទីលំនៅក្នុងសង្កាត់ចាក់អង្រែលើ ខណ្ឌមានជ័យ ជិះម៉ូតូម៉ាកគុបជ្រុង ពណ៌ទឹកប៊ិច ពាក់ស្លាកលេខ កណ្តាល1A-7539។ ចំណែកបុរសបើករថយន្តបង្កមានឈ្មោះ លី សាខន អាយុ ៤៣ឆ្នាំ មានទីលំនៅក្រុងតាខ្មៅ ខេត្តកណ្តាល បើកបររថយន្តម៉ាក ព្រុស ព៌ណកាប់ស្តាំង ពាក់ស្លាកលេខភ្នំពេញ
២AB-៦៨០២។

ប្រភពដដែលបន្តថា មុនពេលកើតហេតុ រថយន្តម៉ាកព្រុស បានបើកបរតាមបណ្តោយផ្លូវជាតិលេខ២ ក្នុងទិសដៅពីជើង ទៅត្បូង លុះដល់ចណុចកើតហេតុ ដោយសារតែបុរសជាអ្នកបើកបរងងឹតមុខក៏បានបុករះម៉ូតូរបស់ស្ត្រីរងគ្រោះ
ខាងលើ និងម៉ូតូម៉ាកហុងដា សេ​១២៥ ព៌ណខ្មៅ ពាក់ស្លាកលេខ ភ្នំពេញ ១CM-៤៥១២ របស់បុរសម្នាក់ទៀត
ពីក្រោយសំណាងមិនបណ្ដាលឲ្យរងគ្រោះថ្នាក់ដល់ជីវិតឡើយ គ្រាន់តែរងការខូចខាតយ៉ាងដំណំតែ
ប៉ុណ្ណោះ ហើយបុរសអ្នកបើកបររថយន្តត្រូវបានកម្លាំងមានសម្ថកិច្ចឃាត់ខ្លួនផងដែរ។

ក្រោយពេលកើតហេតុ ស្ត្រីរងគ្រោះខាងលើត្រូវបាន ក្រុមគ្រួសារបញ្ជូនតាមរថយន្តផ្ទាល់ខ្លួនយកទៅធ្វើ
ព្យាបាលនៅមន្ទីពេទ្យ ចំណែកឯរថយន្តព្រុសបង្ករ និងម៉ូតូទាំង២គ្រឿងដែលរងការខូចខាត និងបុរសអ្នកបើកបររថយន្តត្រូវបានបញ្ជូនយកទៅកាន់ការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយគ្នាជាបន្តទៅទៀត៕