Post News Media ព័ត៌មានជាតិ បង្ហាញមុខជនសង...

បង្ហាញមុខជនសង្ស័យ៤នាក់ ដកហូតថ្នាំញៀនជិត១០កញ្ចប់រួមនឹងអាវុធមួយចំនួន

ចែកចាយបន្ត

ភ្នំពេញ: នគរបាលខណ្ឌច្បារអំពៅ ធ្វើការបង្ហាញមុខជនសង្ស័យចំនួន៤នាក់ ដកហូតគ្រឿងញៀនចំនួន៩កញ្ចប់ កាំភ្លើងបាញ់គ្រាប់កង់ចំនួន២ដើម និងដាវសាម៉ូរៃ១ដើមក្រោយពីឃាត់ខ្លួនបានរយ:ពេលកន្លងមក។ ការបង្ហាញមុខនេះ ធ្វើឡើងកាលពីវេលាម៉ោង៩និង១៥នាទីព្រឹក ថ្ងៃទី២៦ ខែមេសា ឆ្នាំ២០១៧ នោអធិការដ្ឋាននគរបាលខណ្ឌច្បារអំពៅ។

សមត្ថកិច្ចបានឲ្យដឹងថា ក្រុមជនសង្ស័យដែលបានឃាត់ខ្លួនបានខាងលើ ទី១មាន ឈ្មោះ សារ សុខគ្រី អាយុ១៧ឆ្នាំ និងទី២ឈ្មោះ សាលី តាហ្វី អាយុ២១ឆ្នាំ ពួកគេទាំង២នាក់ ជាជនជាតិខ្មែរឥស្លាម ស្នាក់នៅផ្ទះគ្មានលេខ ផ្លូវលេខ៣៦៩ ភូមិព្រែកតាពៅ សង្កាត់ព្រែកប្រា ឃាត់ខ្លួនបានកាលពីវេលាម៉ោង២ និង ៣០នាទីរសៀល ថ្ងៃទី២៥ ខែមេសា ឆ្នាំ២០១៧ ដោយធ្វើការដកហូតបានថ្នាំញៀនប្រភេទម្សៅក្រាមពណ៌សថ្លាចំនួន ៣កញ្ចប់តូច និងម៉ូតូម៉ាកហុងដាសេ១២៥ ពណ៌ខ្មៅ គ្មានស្លាកលេខ១គ្រឿង។ ទី៣ឈ្មោះ ទឹម គយ អាយុ២១ឆ្នាំ មុខរបរមិនពិតប្រាកដ ស្នាក់នៅក្នុងភូមិកោះក្របី សង្កាត់ព្រែកថ្មី ឃាត់ខ្លួនបានកាលពីវេលាម៉ោង៩និង១៥នាទីយប់ ថ្ងៃទី២៥ ខែមេសា ឆ្នាំ២០១៧ ដោយធ្វើការដកហូតបានម្សៅក្រាម ពណ៌សថ្លា ចំនួន៥កញ្ចប់តូច កាំភ្លើងបាញ់គ្រាប់កង់ចំនួន២ដើម និងដាវស៊ាំម៉ូរ៉ៃចំនួន ១ដើមផងដែរ។ ទី៤-ឈ្មោះ សេន ហ្វារីត អាយុ៣០ឆ្នាំ ជនជាតិខ្មែរឥស្លាម មុខរបរមិនពិតប្រាកដ ស្នាក់នៅផ្ទះលេខ៥៤៦ ផ្លូវលេខ៣៦៩ ភូមិព្រែកតាពៅ ក្នុងសង្កាត់ព្រែកប្រា ខណ្ឌច្បារអំពៅ ធ្វើការឃាត់ខ្លួនបានកាលពីវេលាម៉ោង១០ និង២០នាទីយប់ ថ្ងៃទី២៥ ខែមេសា ឆ្នាំ២០១៧ ដោយធ្វើការដកហូតបានថ្នាំញៀនចំនួន១កញ្ចប់តូចផងដែរ។

ក្រុមជនសង្ស័យទាំងនេះ ពាក់ព័ន្ធនឹងករណីជួញដូរ និងប្រើប្រាស់គ្រឿងញៀនដកហូតបានថ្នាំញៀនចំនួន ៩កញ្ចប់តូច កាំភ្លើងបាញ់គ្រាប់កង់ចំនួន២ដើម និងដាវស៊ាំម៉ូរ៉ៃចំនួន១ដើម ត្រូវបានកម្លាំងនគរបាលនៃអធិការដ្ឋានខណ្ឌច្បារអំពៅចាប់ឃាត់ខ្លួនបាននៅក្នុងប្រតិបត្តិការបង្ក្រាបគ្រឿងញៀននៅក្នុងភូមិសាស្ត្ររបស់ខ្លួនជាបន្តបន្ទាប់ និងដើម្បីកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់ជាបន្តទៅទៀត៕

ចែកចាយបន្ត