Post News Media ព័ត៌មានបច្ចេកវិទ្យា អវកាសយានិកម៉ា...

អវកាសយានិកម៉ាឡេស៊ី នឹងមកចែករំលែកបទពិសោធន៍ក្នុងទីអវកាស នៅមហោស្រប STEM លើកទី១៣ នៅចុងសប្តាហ៍នេះ

ចែកចាយបន្ត

ភ្នំពេញ៖ លោកបណ្ឌិត Sheikh Muszaphar Shukor អវកាសយានិកជនជាតិម៉ាឡេស៊ី នឹងអញ្ជើញមកចូលរួមក្នុងឱកាសមហោស្របពិព័រណ៍វិទ្យាសាស្រ្តកម្ពុជា ហៅ​កាត់ថា STEM លើកទី១៣ នៅចុងសប្តាហ៍នេះ ដើម្បីចែករំលែកបទពិ​សោ​ធ​ន៍​របស់លោក ក្នុងដំណើរលើលំហអាកាស និងការស្រាវជ្រាវផ្សេងៗទៀតក្នុងយានអវកាស។ 

វាគ្មិនជាអវកាសយានិក មកពីប្រទេសនៃតំបន់អាស៊ានដ៏វៃក្មេងរូបនេះ នឹងធ្វើ​បទ​បង្ហាញមួយ ហើយនឹងនាំមកនូវការសាកល្បង ព្រមទាំងភាពភ្ញាក់ផ្អើលផ្សេងៗ ជាបន្តបន្ទាប់ទៀត។

គួររំឭកថា មហោស្របពិព័រណ៍ STEM ក្នុងឆ្នាំនេះ នឹងចាប់ផ្តើមប្រព្រឹត្តទៅនៅថ្ងៃសៅរ៍ និងថ្ងៃអាទិត្យ ទី ២៩-៣០ មេសា ២០១៧ នៅឯមជ្ឈមណ្ឌលសន្និបាត និងពិ​ព័រណ៍​កោះពេជ្រ អគារ A, B និង C ក្រោមការឧបត្ថម្ភគាំទ្រពីស្ថាប័ន និងក្រុមហ៊ុននានា ទាំងក្នុង និងក្រៅប្រ​ទេស។ នេះបើយោងតាមសេចក្តីប្រកាសព័ត៌មានលើទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា ថ្ងៃទី ០១ មេសា​។

សេចក្តីប្រកាសព័ត៌មានដដែលបានឱ្យដឹងថា ពិព័រណ៌ STEM លើកទី ១៣ នេះ ក្រសួងអប់រំ យុវជន និងកីឡា រៀបចំឡើងក្រោមកិច្ចសហការជាមួយអង្គការពិព័រណ៍​វិទ្យាសាស្ត្រកម្ពុជា និងក្នុងគោលបំណងជំរុញសិស្សានុសិស្ស និស្សិត លោកគ្រូ-អ្នកគ្រូ បុគ្គល និងស្ថាប័នពាក់ព័ន្ធ មានការចាប់អារម្មណ៍ និងយកចិត្តទុក​ដាក់កាន់តែខ្លាំងទៅលើមុខជំនាញដែលទាក់ទងទៅនឹងវិទ្យាសាស្ដ្រ បច្ចេកវិទ្យា វិស្វកម្ម និងគណិតវិទ្យា ដែលជាមុខជំនាញដ៏មានសក្តានុពល សម្រាប់ចូលរួមចំណែកក្នុងការអភិវឌ្ឍសេដ្ឋកិច្ច ឧស្សាហកម្ម កសិ-ឧស្សាហកម្ម និងពាណិជ្ជូបនីយកម្មកម្ពុជា។

ក្នុងព្រឹត្តិការណ៍ពិព័រណ៍រយ:ពេល ២ ថ្ងៃនេះ នឹងមានសកម្មភាពសំខាន់ៗដូចជាពិព័រណ៍វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា ព្រមទាំងការធ្វើសិក្ខាសាលា បឋាកថាខ្លីៗ ការប្រគុំតន្រ្តី និងលេងល្បែកកម្សាន្តផ្សេងៗជាដើម ហើយសាធារណ​ជន​អាចចូលទស្សនាដោយសេរី និងដោយឥតគិតថ្លៃ ចាប់ពីម៉ោង ៩ ព្រឹក ដល់ម៉ោង ៥ ល្ងាច នាថ្ងៃសៅរ៍ និងថ្ងៃអាទិត្យ៕