Post News Media ព័ត៌មានជាតិ ខ្ចីម៉ូតូមិត្...

ខ្ចីម៉ូតូមិត្តយកទៅលក់ដើម្បីទិញគ្រឿងញៀនជក់ ចុងក្រោយជាប់ខ្នោះសមត្ថកិច្ច!

ចែកចាយបន្ត

កណ្តាល: ភ្នាក់ងារPost News បានរាយការណ៍មកថា ជនសង្ស័យមា្នក់ ត្រូវបានសមត្ថកិច្ចឃាត់ខ្លួន ក្រោយពីធ្វើសកម្មភាពលួចម៉ូតូបានសម្រេច។

ហេតុការណ៍នេះបានកើតឡើងកាលពីវេលាម៉ោង២រសៀល ថ្ងៃទី ២៦ ខែមេសា ឆ្នាំ២០១៧ នៅចំណុច ភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។

សមត្ថកិច្ចឲ្យដឹងថា ជនរងគ្រោះមានឈ្មោះ សេង រតនា ភេទប្រុស អាយុ៣២ឆ្នាំ មុខរបរ ជាងជួសជុលទូរសព្ទ មានទីលំនៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។ ចំណែកជនសង្ស័យឈ្មោះ វ៉ែន មករា ភេទប្រុស អាយុ២៣ឆ្នាំ មុខរបរបើកបររថយន្ត ស្នាក់នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។

ប្រភពដដែលបានបន្តថា មុនពេលកើតហេតុ ជនរងគ្រោះបានទុកម៉ូតូនៅក្នុងផ្ទះហើយទៅធ្វើការដូចសព្វដង មួយសន្ទុះក្រោយមក ឈ្មោះ អ៊ុច ធារី ត្រូវជាបងស្រី របស់ជនរងគ្រោះបានហៅទូរសព្ទប្រាប់ថា ជនសង្ស័យ បានលួចម៉ូតទៅបាត់។ លុះស្អែកឡើងជនរងគ្រោះបានមកដាក់ពាក្យបណ្តឹងនៅការិយាល័យព្រហ្មទណ្ឌកម្រិតស្រាល រហូតដល់ម៉ោង៥និង៣០នាទីល្ងាច សមត្ថកិច្ចបានធ្វើការឃាត់ខ្លួនជនសង្ស័យសួរនាំ ។

ក្រោយពីធ្វើការសាកសួរ ជនសង្ស័យបានសារភាព ខ្លួនពិតជាបានលួចយកម៉ូតូរបស់ជនរងគ្រោះពីផ្ទះពិតមែនហើយបានជិះយកទៅបញ្ចាំនៅផ្សារឃ្លាំងរំសេវ ក្នុងតម្លៃ១៥០ដុល្លារ រួចហើយបានយកប្រាក់ទៅជក់ថ្នាំញៀនប្រភេទម៉ាទឹកកក នៅវាលខ្សាច់ អស់លុយចំនួន ៣០,០០០រៀល ហើយក៏បានជិះម៉ូតូឌុប មកលេងល្បែងនៅអិន ធើណេត (ឡូតូ)នៅក្រុងតាខ្មៅ នៅជិតអតីតរោងកុន ក្រុងតាខ្មៅ រហូតដល់ម៉ោង៨យប់។

បច្ចុប្បន្ន ជនសង្ស័យ ត្រូវបានសមត្ថកិច្ចឃុំខ្លួនជាបណ្តោះអាសន្ន ធ្វើការសាកសួរ និងកសាងសំណុំរឿង បញ្ជូនទៅតុលាការ ចាត់ការតាមនីតិវិធីច្បាប់៕