Post News Media ព័ត៌មានជាតិ ទៀតហើយ! អ្នកដ...

ទៀតហើយ! អ្នកដែលឆក់កណ្តុរ បែរជាឆក់ខ្លួនឯងស្លាប់!

ចែកចាយបន្ត

កណ្តាល: បុរសម្នាក់ ត្រូវបានប្រជាពលរដ្ឋប្រទះឃើញស្លាប់បាត់បង់ជីវិត ខណ:ដែលឆក់ខ្សែភ្លើង ដែលដាក់សម្រាប់ឆក់កណ្តុរ។

ហេតុការណ៍នេះបានកើតឡើងកាលពីវេលាម៉ោង ៧និង៤០នាទី យប់ថ្ងៃទី៤ ខែឧសភា ឆ្នាំ២០១៧ ស្ថិតនៅចំណុចដីស្រែប្រាំង ចុងព្រែកយាយកែម ស្ថិតក្នុងភូមិព្រែកតាឃិន ឃុំជ្រោយតាកែវ ស្រុកកោះធំ ខេត្តកណ្តាល។

ជនរងគ្រោះដែលស្លាប់ខាងលើ មានឈ្មោះ ទុយ គ្រី ភេទប្រុស អាយុ៤១ឆ្នាំ
មុខរបរកសិករ ស្នាក់នៅភូមិព្រែកតាឃិន ឃុំជ្រោយតាកែវ ស្រុកកោះធំ ខេត្តកណ្តាល។

ក្នុងនោះដែរ សមត្ថកិច្ចបានរកឃើញ អាគុយ៣កា ៤០អំពែ ចំនួន១គ្រឿង, អាំងវ៉ុលទ័របំលែងភ្លើង១គ្រឿង និងខ្សែលួសរាយ ឆក់កណ្តុរមួយចំនួន។

ប្រភពព័ត៌មានបានឲ្យដឹងថា កន្លងពីពេលកន្លងមក ជនរងគ្រោះ តែងតែទៅឆក់កណ្តុរ នៅចំណុចដីស្រែប្រាំងរបស់ខ្លួន ដើម្បីកុំឲ្យកណ្តុរចូលស៊ីស្រូវ លុះនៅថ្ងៃកើតហេតុ វេលាម៉ោង៥និង៣០នាទីល្ងាច ជរងគ្រោះបានចេញពីផ្ទះទៅដីស្រែប្រាំងរបស់ខ្លួននៅចំណុចខាងលើ ជាមួយឈ្មោះ រុំ សុខណា ភេទប្រុស អាយុ២៥ ឆ្នាំ ឈ្មោះ ប៉ូ រដ្ឋ ភេទប្រុស អាយុ៣៥ឆ្នាំ និងឈ្មោះ ទែន សារី ភេទប្រុស អាយុ២៧ឆ្នាំដើម្បីឆក់កណ្តុរបន្តទៀត តាមដីស្រូវស្រែរៀងៗខ្លួន។

លុះនៅវេលាម៉ោង៦និង៣០ ល្ងាចថ្ងៃដដែល ជនរងគ្រោះបានទៅដល់កន្លែងដីស្រែប្រាំងរបស់ខ្លួន រួចក៏ចាប់ផ្តើមបន្តចរន្តឆក់កណ្តុរ បន្តិចក្រោយមកជនរងគ្រោះក៏ដើរមើលកណ្តុរជាប់តាមខ្សែលួស តែមិនបានដោះចរន្តភ្លើងអាគុយទេ មួយសន្ទុះក្រោយមកឈ្មោះ រុំ សុខណា ដែលទៅជាមួយគ្នាបាត់មិនឃើញត្រឡប់មកវិញក៏ដើរទៅមើលកន្លែងដាក់អាគុយឃើញភ្លើងសញ្ញាអាំងវ៉ុលទ័រលោត ខុសធម្មតា ក៏ផ្តាច់ចរន្តភ្លើងអាគុយរួចដើរទៅមើលតាមភ្លឺស្រែ ក៏ឃើញជនរងគ្រោះដួលទៅលើខ្សែលួសរួចក៏ស្រែកហៅឈ្មោះ ប៊ូ រដ្ឋ និងឈ្មោះ ទែន សារី ដែលនៅជិតនោះឲ្យជួយ ពេលមកដល់ក៏នាំគ្នាលើកជនរងគ្រោះឡើងដើម្បីធ្វើចលនា តែជនរងគ្រោះបានស្លាប់បាត់ទៅហើយ រួចក៏ផ្តល់ដំណឹងឲ្យក្រុមគ្រួសារ មកដើម្បីយកជនរង
គ្រោះទៅផ្ទះទើប រាយការណ៍ជូនសមត្ថកិច្ច។

ក្រោយពីបានទទួលបានព័ត៌មាននេះភ្លាម សមត្ថកិច្ចជំនាញ បានចុះមកធ្វើការពិនិត្យសាកសពដល់កន្លែងកើតហេតុ បានឲ្យដឹងថា សពជនរងគ្រោះពិតជាស្លាប់ដោយសារតែការឆក់ចរន្តអគ្គិសនីពិតប្រាកដមែន ហើយបច្ចុប្បន្នសពជនរងគ្រោះខាងលើ ត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕

ចែកចាយបន្ត