Post News Media ព័ត៌មានជាតិ ឃាត់ខ្លួនជនសង...

ឃាត់ខ្លួនជនសង្ស័យ៦នាក់ ជាមុខសញ្ញាជួញដូរនិងចែកចាយគ្រឿងញៀន

ចែកចាយបន្ត

កណ្តាល: ជនសង្ស័យ៦នាក់ ត្រូវបានសមត្ថកិច្ចឃាត់ខ្លួន ពាក់ពន្ធ័នឹងករណីជួញដូរនិងចែកចាយគ្រឿងញៀនដោយខុសច្បាប់។

ការចាប់ឃាត់ខ្លួននេះបានធ្វឡើងកាលពីវេលាម៉ោង១០និង៤០នាទី ព្រឹកថ្ងៃទី ១៤ ខែ ឧសភា ឆ្នាំ២០១៧ នៅចំណុចភូមិ ចុងកោះលិច ឃុំ កោះខ្សាច់ទន្លា ស្រុកស្អាង ខេត្តកណ្ដាល ។

សមត្ថកិច្ចបានឲ្យដឹងថា ជនសង្ស័យ ៦នាក់ ទី១ឈ្មោះ លឹម លី ភេទ ប្រុស អាយុ ៣៩ឆ្នាំ មុខរបរ លក់ថ្នាំញៀន,ទី២ឈ្មោះ ង៉ុយ ចិន ភេទប្រុស អាយុ ២៥ឆ្នាំ មុខរបរ លក់ថ្នាំញៀន,ទី៣ឈ្មោះ រ៉ា ថារ៉ាន់ ភេទប្រុស អាយុ ២០ឆ្នាំ មុខរបរ កម្មករ,ទី៤ឈ្មោះ រី សុភា ភេទប្រុស អាយុ ២០ឆ្នាំ មុខរបរ កម្មករ,ទី៥ឈ្មោះ ចែម សុខហួន ហៅឡយ ភេទប្រុស អាយុ ២២ឆ្នាំ មុខរបរ កម្មករ និងទី៦ឈ្មោះ ពុយ ចិត្ត ភេទ ប្រុស អាយុ ២៣ ឆ្នាំ មុខរបរ កម្មករ អ្នកទាំង៦នាក់ស្នាក់នៅភូមិឃុំកើតហេតុខាងលើ ។
ក្នុងនោះដកហូតបាន៖ម្សៅក្រាមពណ៌សថ្លា សង្ស័យជាគ្រឿងញៀន ប្រភេទម៉ាទឹកកក ចំនួន៤ កញ្ចប់ ក្នុងនោះ ធំ២ កញ្ចប់ និង តូច២ កញ្ចប់ ,ទូរសព្ទ១គ្រឿង ម៉ាក ណូគា ចុចពិល,ឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន ។

មុនឈានដល់ការចាប់ឃាត់ខ្លួនជនសង្ស័យខាងលើ កម្លាំងផ្នែកប្រឆាំងគ្រឿងញៀន សហការជាមួយ កម្លាំងប៉ុស្តិ៍នគរបាលរដ្ឋបាលកោះខ្សាច់ទន្លា បានធ្វើការឃាត់ត្រួតពិនិត្យ ឈ្មោះ ចែម សុខហួន និង ឈ្មោះ ពុយ ចិត្ត នៅចំណុចភូមិ ចុងកោះលិច ឃុំខ្សាច់ទន្លា ស្រុកស្អាង ខេត្តកណ្តាល បានរកឃើញគ្រឿងញៀន ចំនួន២កញ្ចប់តូច ។ រួចបញ្ជូនជនសង្ស័យទាំង២នាក់ មកកាន់ប៉ុស្តិ៍នគរបាលកោះខ្សាច់ទន្លា ដើម្បីសាកសួរ ។

នៅចំពោះមុខសមត្ថកិច្ចន ជនសង្ស័យឈ្មោះ ពុយ ចិត្ត និង ឈ្មោះ ចែម សុខហួន បានសារភាពថា ខ្លួនពិតជាបានទិញគ្រឿងញៀន ចំនួនកញ្ចប់តូច ពីឈ្មោះ លឹម លី ភេទ ប្រុស អាយុ ៣៩ឆ្នាំ ទីលំនៅ ភូមិ ពោធិកណ្តាល ឃុំត្រើយស្លា ស្រុកស្អាង ខេត្តកណ្តាល ដើម្បីយកទៅប្រើប្រាស់។ ចំណែក គ្រឿងញៀន ចំនួន២កញ្ចប់តូចទៀត ខ្លួនបានឲ្យទៅឈ្មោះ ម៉ៃ វ៉ា ភេទប្រុស អាយុ៣០ឆ្នាំ ដែលឲ្យលុយខ្លួនទៅទិញ ។

ដោយទទួលបានបទបញ្ជាពីលោក ស្នងការនគរបាលខេត្តកណ្តាល ដឹកនាំសម្របសម្រួលពី លោកស្នងការរងទទួលផែនប្រឆាំងបទល្មើស និងទទួលបានការឯកភាពពីលោកព្រះរាជអាជ្ញា នៃអយ្យការអមសាលាដំបូងខេត្តកណ្តាល អនុញ្ញាត្តិឲ្យធ្វើការឆែកឆេររកវត្ថុតាង មានការដឹកនាំផ្ទាល់ ពីលោកវរសេនីយ៍ឯក សេង សុជាតិ អធិការនគរបាលស្រុកស្អាង សហការជាមួយ កម្លាំងប៉ុស្តិ៍នគរបាល កោះខ្សាច់ទន្លា និង កម្លាំងប៉ុស្តិ៍នគរបាល ត្រើយស្លា បន្តទៅឃាត់ខ្លួនឈ្មោះ លឹម លី រួចធ្វើការត្រួតពិនិត្យ ឆែកឆេរផ្ទះរបស់ឈ្មោះ លឹម លី នៅចំណុចភូមិ ពោធិ៍កណ្តាល ឃុំត្រើយស្លា ស្រុកស្អាង ខេត្តកណ្តាល បានរកឃើញថ្នាំញៀនប្រភេទ ម៉ាទឹកកក ចំនួន១កញ្ចប់ធំ និងបន្តទៅឃាត់ខ្លួន ឈ្មោះ ង៉ុយ ចិន,ឈ្មោះ រ៉ា ថារ៉ាន់, ឈ្មោះ រី សុភា បានរកឃើញគ្រឿងញៀន ចំនួន១កញ្ចប់ធំ និង ឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន។

បន្ទាប់មកសមត្ថកិច្ចនគរបាលបានឃាត់ខ្លួនជនសង្ស័យ រួមជាមួយវត្ថុតាង បញ្ជូនមកកាន់អធិការដ្ឋាននគរបាលស្រុកស្អាង ដើម្បីសាកសួរបន្ត និងអនុវត្តន៍ តាមនីតិវិធីច្បាប់៕