Post News Media ព័ត៌មានជាតិ លទ្ធផលជិះលឿន!...

លទ្ធផលជិះលឿន! ជិះម៉ូតូបោះពួយទៅបុករថយន្ត ភីកអាប់ របស់គេពេញទំហឹង របួសធ្ងន់ស្រាល៣នាក់

ចែកចាយបន្ត

ភ្នំពេញ: គ្រោះថ្នាក់ចរាចរណ៍មួយបានកើតឡើង បន្ទាប់ពីបុរស៣នាក់ ជិះម៉ូតូឌុបគ្នាក្នុងល្បឿនលឿន ជ្រុលទៅបុកចំរថយន្តម៉ាក ភីកអាប់ ពេញទំហឹង បណ្តាលឲ្យដួលរងរបួសធ្ងន់និងស្រាលដោយខ្លួនឯង។ ចំណែករថយន្តបានបើកចេញពីកន្លែងកើតហេតុ បាត់ស្រមោល។

ហេតុការណ៍នេះ កើតឡើងកាលពីវេលាម៉ោង ១២ យប់ឈានថ្ងៃទី១៨ ខែឧសភា ឆ្នាំ២០១៧ ស្ថិតនៅតាមបណ្តោយផ្លូវម៉ុងឬទ្ធី កែងនឹងផ្លូវ១០១៥ ស្ថិតក្នុងភូមិប៉ាយ៉ាប សង្កាត់ឃ្មួញ ខណ្ឌសែនសុខ រាជធានីភ្នំពេញ ។

តាមសាក្សីពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញជនរងគ្រោះមានគ្នា៣នាក់ ជិះម៉ូតូមួយគ្រឿង ម៉ាកហុងដាឌ្រីម ស៊េរី០១២ ពាក់ស្លាកលេខ កំពង់ចាម 1K-3501 បានធ្វើដំណើរ តាមបណ្តោយផ្លូវម៉ុងឬទ្ធី ក្នុងទិសដៅពីកើតទៅលិច ដោយល្បឿនលឿន។ ចំណែករថយន្តបង្កមិនស្គាល់ម៉ាក តែគ្រាន់តែដឹងថាជាប្រភេទរថយន្តភីកអាប់ ពណ៌ខ្មៅ មិនចាំស្លាកលេខ បើកពីលិចទៅកើត ខណ:មកដល់ចំណុចកើតហេតុ រថយន្តបានបត់មកផ្លូវ១០១៥ លុះបត់បានបន្តិចក៏មានម៉ូតូរបស់ជនរងគ្រោះ ជិះមកបុកពេញទំហឹង ភ្លាមៗរថយន្តបានបន្ថែមល្បឿនរត់បាត់ស្រមោល ទាំងបែកកង់មុខ។ ចំណែកបុរស៣នាក់ ដែលជិះម៉ូតូ រងរបួសធ្ងន់ធ្ងរ២នាក់ បាក់ជើងជាច្រើនកំណាត់ និងបែកក្បាល រីឯម្នាក់ទៀតរងរបួសស្រាល ដោយឡែកម៉ូតូវិញខូចខាតយ៉ាងដំណំ។

ក្រោយកើតហេតុ ជនរងគ្រោះត្រូវបានរថយន្តសាមុយគ្លីនិកឯកជន រស្មី ដឹកយកទៅសង្គ្រោះនិងព្យាបាល។ ចំណែករីឯម៉ូតូរបស់ជនរងគ្រោះត្រូវបានសមត្ថកិច្ចជំនាញចរាចរណ៍ខណ្ឌសែនសុខ មកវាស់វែងធ្វើកំណត់ហេតុ យកម៉ូតូរក្សាទុកនៅអធិការនគរបាលខណ្ឌសែនសុខ ដើម្បីរងចាំម្ចាស់យកឯកសារពាក់ព័ន្ធមកទើបប្រគល់ម៉ូតូជូនវិញ៕