Post News Media ព័ត៌មានជាតិ ក្មេងប្រុសអាយ...

ក្មេងប្រុសអាយុ១៥ឆ្នាំម្នាក់ លួងលោមក្មេងស្រីអាយុ១៣ឆ្នាំដេកផ្ទះសំណាក់បានសម្រេច ត្រូវឪពុកម្តាយប្តឹងសមត្ថកិច្ចចាប់ខ្លួន

ចែកចាយបន្ត

ភ្នំពេញ: ក្មេងប្រុសអាយុ១៥ឆ្នាំម្នាក់ ត្រូវបានឪពុកម្តាយក្មេងស្រីរងគ្រោះប្តឹងសមត្ថកិច្ចឲ្យចាប់ខ្លួន បន្ទាប់ពីក្មេងប្រុសសង្ស័យខាងលើបានលួងលោមក្មេងស្រីអាយុ១៣ឆ្នាំម្នាក់ចេញពីផ្ទះបាត់មួយយប់មួយថ្ងៃ ហើយក៏ប្តឹងសមត្ថកិច្ចឲ្យចាប់ខ្លួនតែម្តង។

ហេតុការណ៍ឃាត់ខ្លួនខាងលើនេះ កាលពីវេលាម៉ោង ១២ ថ្ងៃត្រង់ ទី១៤ ខែមិថុនា ឆ្នាំ២០១៧ នៅចំណុចក្នុងវត្តទួលសង្កែ ស្ថិតក្នុងភូមិបាក់ទូក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យដែលសមត្ថកិច្ចឃាត់ខ្លួនោះ មានឈ្មោះ អ៊ុ សារ៉ាត់ អាយុ១៥ឆ្នាំ មានមុខរបរ ជាសិស្សថ្នាក់ទី៦ នៃសាលាអនុវិទ្យាល័យ ទួលសង្កែ ស្នាក់នៅបន្ទាប់ជួល ភូមិចុងខ្សាច់ សង្កាត់ទួលសង្កែ១។ ចំណែកឯក្មេងស្រីរងគ្រោះមានឈ្មោះ ស.អ.ណ.អ.រ.ហ អាយុ១៣ឆ្នាំ មានមុខរបរ សិស្សថ្នាក់ទី៧ នៅសាលាឯកជន មួយកន្លែង មានទីលំនៅសង្កាត់ច្រាំងចំរេះ១ ខណ្ឌឫស្សីកែវ។

តាមប្រភពព័ត៌មានបានឲ្យដឹងថា មុនពេលកើតហេតុកាលពីវេលាម៉ោង ៧ ព្រឹក ថ្ងៃទី១៣ ខែមិថុនា ក្មេងស្រីរងគ្រោះបានចេញពីផ្ទះមករៀននៅសាលាឯកជន មួយកន្លែង រួចនៅពេលចេញពីសាលារៀនមិនឃើញត្រឡប់មកផ្ទះវិញសោះ រួចមកឪពុកម្តាយក៏បានហៅទូរសព្ទជាច្រើនលើកតែមិនចូល ហើយក្រុមគ្រួសារក៏មានការសង្ស័យបាននាំគ្នាដើររកគ្រប់ច្រកល្ហក់យ៉ាងណាក៏រកមិនឃើញ។

លុះដល់វេលាម៉ោង ១២ ថ្ងៃត្រង់ ទី១៤ខែឆ្នាំដដែល ទើបប្រទះឃើញពួកគេទាំង២នាក់ កំពុងតែអង្គុយនិយាយគ្នាលេងនៅក្នុងវត្តខាងលើ ក៏ត្រូវឪពុកម្តាយក្មេងស្រីរងគ្រោះចាប់ឃាត់ខ្លួនយកមកប្រគល់ឲ្យសមត្ថប៉ុស្តិ៍ទួលសង្កែតែម្តង។

ក្រោយមក សមត្ថកិច្ចបានធ្វើការសាកសួររួចមក ក្មេងប្រុសសង្ស័យខាងលើបានសារភាពថា ខ្លួនបានយកក្មេងស្រីរងគ្រោះទៅដេកនៅផ្ទះសំណាក់ យីហោ បៃតង ដែលស្ថិតនៅក្នុងសង្កាត់ទួលសង្កែ ខណ្ឌឫស្សីកែវ ហើយក្មេងសង្ស័យមិនបានបញ្ជាក់ថា រូបគេបានរួមភេទបានប៉ុន្មានដងនោះទេ ហើយរូបគេទាំង២នាក់បានមានទំនាក់ទនងស្នេហានិងគ្នារយ:ពេល ១ឆ្នាំមកហើយ។

បច្ចុប្បន្នជនសង្ស័យខាងលើ ត្រូវសមត្ថកិច្ចបញ្ជូនខ្លួនឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវដើម្បីកសាងសំណុំរឿង ចាត់ការបន្តតាមផ្លូវច្បាប់៕