Post News Media ព័ត៌មានជាតិ កម្លាំងកងរាជអ...

កម្លាំងកងរាជអាវុធហត្ថ បញ្ជូនខ្លួនជនសង្ស័យ៣នាក់ ទៅតុលាការ!

ចែកចាយបន្ត

ភ្នំពេញ: នៅរសៀលថ្ងៃទី១៤ ខែមិថុនា ឆ្នាំ២០១៧ សមត្ថកិច្ចជំនាញនៃការិយាល័យបង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ បានបញ្ជូនជនសង្ស័យ ៣នាក់ ទៅតុលាការ លើ ២ករណីផ្សេងគ្នា ដើម្បីផ្តន្ទាទោសតាមនិតិវិធីច្បាប់។

ជនសង្ស័យ ៣នាក់ ទី១ឈ្មោះ ឈុន វាសនា ភេទប្រុស អាយុ២៤ឆ្នាំ,ទី២ ឈ្មោះ កុយ បញ្ញារ៉ា ភេទប្រុស អាយុ ១៧ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌដូនពេញ ធ្វើការបង្ក្រាប និងឃាត់ខ្លួនបានកាលពីថ្ងៃទី១២ ខែមិថុនា ឆ្នាំ២០១៧ ពាក់ព័ន្ធករណី លួចកាច់កម៉ូតូ នៅចំណុចក្រោមស្ពានកោះពេជ្រ សង្កាត់ចតុមុខ ខណ្ឌដូនពេញ ដែលជនសង្ស័យទាំង ២នាក់ខាងលើ បានធ្វើសកម្មភាពលួចកាច់ក ម៉ូតូរបស់ជនរងគ្រោះឈ្មោះ ព្រឿង កំសត់ ហៅទូច ភេទប្រុស អាយុ ១៩ឆ្នាំ ម៉ាកស៊ុយសាគី និច ពណ៌ស លាយលឿងខ្ចី ពាក់ស្លាកលេខ ភ្នំពេញ 1FS-4335 កាលពីវេលាម៉ោង២ យប់រំលងអធ្រាត្រ ឈានចូលថ្ងៃទី១០ ខែមិថុនា ឆ្នាំ២០១៧ នៅចំណុចសួនច្បារមុខរូបសំណាកសម្តេចតា ស្ថិតនៅផ្លូវព្រះសីហនុ សង្កាត់ទន្លេបាសាក់ ខណ្ឌចំការមន ខណ:ដែលជនរងគ្រោះកំពុងតែដេកលក់។

និងទី៣ឈ្មោះ ច័ន្ទ គោរព ភេទប្រុស អាយុ ៥០ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌពោធិ៍សែនជ័យ ឃាត់ខ្លួនកាលពីវេលាម៉ោង៤ និង៤០នាទី ថ្ងៃទី១៣ ខែមិថុនា ឆ្នាំ២០១៧ ពាក់ព័ន្ធករណី ហិង្សាដោយចេតនា នៅចំណុច ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ ដែលជនសង្ស័យខាងលើ បានវាយតប់ទៅលើឈ្មោះ ថោង សុខាភារូ បណ្តាលឲ្យរបួសក្បាល ជាំភ្នែកទាំងសងខាងដងខ្លួន និងរបួសជើងឆ្វេងផងដែរ៕