Post News Media ព័ត៌មានជាតិ ពលរដ្ឋម្នាក់ប...

ពលរដ្ឋម្នាក់ប្តឹងយោធាផ្តាយ១ ថាសង់ផ្ទះរំលោភដីរបស់គាត់

ចែកចាយបន្ត

កំពត: ពលរដ្ឋម្នាក់បានចោទមន្ត្រីយោធាផ្តាយ១ម្នាក់ ថាបានសង់ផ្ទះរំលោភលើដីរបស់គាត់ចំនួន២តឹក ព្រមទាំងបានសង់លើដីចំណីផ្លូវដើរថែមទៀត។

លោក ភូ ម៉េង ពលរដ្ឋភូមិទ្វីខាងត្បូង សង្កាត់អណ្តូងខ្មែរ ក្រុងកំពត បានរៀបរាប់ប្រាប់អ្នកសារព័ត៌មានថា បច្ចុប្បន្នលោក ទិត្យ គឹមសេង ជាមន្ត្រីយោធាផ្តាយ១នៅខេត្តកំពត បានសង់ផ្ទះលើឃឿនព្រំប្រទល់ធ្វើ ឲ្យសំយ៉ាបចូលលើដីរបស់គាត់ចំនួន២តឹក ព្រមទាំងសង់រំលោភលើចំណីផ្លូវថែមទៀត។

លោកភូ ម៉េង បន្តថា កន្លងមកលោកបានដាក់ពាក្យប្តឹងរហូតឈានដល់តុលាការ ហើយចៅក្រមបានចេញសេចក្តីសម្រេចរក្សាការពារហាមឃាត់មិនឲ្យលោកយោធា បន្តសាងសង់អ្វីឡើយ។ មួយខែក្រោយមកចៅក្រមដដែលបែរជាចេញសេចក្តីសម្រេចឲ្យគាត់បន្តសំណង់ឡើងវិញ។ លោកភូ ម៉េង ថ្លែងថាលោកពុំអនុញ្ញាតនោះទេព្រោះសំណង់ធ្វើចូលដីលោក ដូច្នេះត្រូវតែមានអាជ្ញាធរនិងជំនាញវាស់វែងជាមុនសិន ព្រោះដីលោកមានប្លង់និងឯកសារគ្រប់គ្រាន់។

ទាក់ទងការចោទប្រកាន់នេះ យើងមិនអាចសុំការបំភ្លឺពីលោកទិត្យ គឹមសេង ដែលជាមន្ត្រីយោធាផ្តាយ១បាននោះទេ នៅព្រឹកមិញនេះ ក៏ប៉ុន្តែលោក សេង សៅរ័ត្ន ដែលត្រូវជាកូនប្រុសសុំឆ្លើយជំនួស ដោយហេតុថាផ្ទះនេះឪពុកលោកបានប្រគល់ឲ្យលោករួចរាល់ហើយ ពុំមានពាក់ព័ន្ធនិងឪពុកលោកជាយោធាទៀតទេ លោកសេង សៅរ័ត្ន បាននិយាយថា ផ្ទះរបស់លោកពុំបានសាងសង់ដូចការចោទប្រកាន់របស់អ្នកជិតខាងនោះទេ គឺគ្រាន់តែជួសជុលតែប៉ុណ្ណោះ ហើយក៏ពុំបានរំកិលចូលដីលោក ភូ ម៉េង ដែរ ពោលគឺជំហរផ្ទះនៅដដែលគ្រាន់តែផ្លាស់សរសរពុក ដាក់សរសរថ្មី និងចាក់ដីតែប៉ុណ្ណោះ ហើយផ្ទះមួយនេះមានតាំងពីឆ្នាំ១៩៨៨មកម្ល៉េះមិនដែលឃើញមានអ្នកជំទាស់ទេ ហេតុអ្វីពេលនេះទើបតែចោទថាធ្វើចូលដីគាត់ទៅវិញ។

ទាក់ទងករណីបនលរដ្ឋចោទប្រកាន់ថា ផ្ទះលោកយោធាសង់រំលោភលើដីគេ និងរំលោភលើចំណីផ្លូវបែបនេះលោក បេង សំណាង ប្រធានការិយាល័យរៀបចំដែនដីក្រុងកំពត (ភូមិបាល) បានមានប្រសាសប្រាប់ ឲ្យដឹងថា ផ្ទះមន្ត្រីយោធាខាងលើពិតជា បានសង់លើចំណីផ្លូវសាធារណ:មែន ហើយជំនាញនិងអាជ្ញាធរ ក៏បានហាមឃាត់រួចហើយដែរ ប៉ុន្តែបែរជាមានសេចក្តីសម្រេចពីតុលាការឲ្យជួសជុលម្តងទៀត ដែលជាហេតុធ្វើឲ្យមានរឿងជំទាស់ពីម្ចាស់ដីដែលមានប័ណ្ណ ព្រោះក្នុងបណ្ណបញ្ជាក់ថាជាប់ផ្លូវ ពុំមែនជាប់ផ្ទះខាងលើឡើយ លោក បេង សំណាង បញ្ជាក់ថា បច្ចុប្បន្ន មានពលរដ្ឋជាច្រើនគ្រួសារក្នុងជួរផ្ទះខាងលើនេះ គឺសុទ្ធតែគ្មានបណ្ណកម្មសិទ្ធ ព្រោះសង់លើគម្រោងផ្លូវ ដូច្នេះរឿងនេះមានតែអាជ្ញាធរខេត្តទេទើបមានលទ្ធភាពដោះស្រាយ៕