Post News Media ព័ត៌មានជាតិ រថយន្តព្រូស ប...

រថយន្តព្រូស បុករះម៉ូតូ២គ្រឿងពេញទំហឹង បណ្តាលឲ្យមនុស្សយ៉ាងហោចណាស់ ៤នាក់របួសធ្ងន់ស្រាល

ចែកចាយបន្ត

កណ្តាល: គ្រោះថ្នាក់ចរាចរណ៍មួយ បង្កឲ្យមានការភ្ញាក់ផ្អើលទាំងយប់ ខណ:ដែលមានរថយន្តព្រូសមួយគ្រឿង បើកបរក្នុងល្បឿនលឿនខ្វះការប្រុងប្រយត្ន័ បានជ្រុលចង្កូតទៅបុករះម៉ូតូ២គ្រឿងបន្តបន្ទាប់គ្នា បណ្តាលឲ្យមនុស្ស៤នាក់ មានប្រុស មានស្រី និងក្មេងតូចម្នាក់ រងរបួសធ្ងន់ នៅនឹងកន្លែង។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៣០នាទី យប់ថ្ងៃទី៦ ខែកក្កដា ឆ្នាំ២០១៧ ត្រង់ចំណុចខាងមុខហាងសុភី លើផ្លូវជាតិលេខ២១ ភូមិថ្មីសង្កាត់តាខ្មៅ ក្រុងតាខ្មៅ ខេត្តកណ្តាល។

នគរបាលចរាចរណ៍បានឲ្យដឹងថា ជនរងគ្រោះខាងលើនេះ ទី១ឈ្មោះ ឡុញ រី ភេទប្រុស អាយុ៣៨ឆ្នាំ នៅភូមិបត្តាជី សង្កាត់ព្រែកហូរ ក្រុងតាខ្មៅ (រងរបួសធ្ងន់) និងមានអ្នករួមដំណើរជាមួយ២នាក់ទៀត ទី២.ឈ្មោះ ម៉ាត់ ម៉ាលី ភេទស្រី អាយុ៣៨ឆ្នាំ ត្រូវជាប្រពន្ធ(រងរបួសធ្ងន់) ទី៣ឈ្មោះ ម៉ាលី ហ្សា ភេទស្រី អាយុ៨ឆ្នាំ ត្រូវជាកូន(រងរបួសធ្ងន់) និងទី៤ឈ្មោះ ជា សាហ៊ុយ ភេទប្រុស អាយុ២១ឆ្នាំ នៅភូមិតាខ្មៅ សង្កាត់តាខ្មៅ ក្រុងតាខ្មៅ។

បើតាមសាក្សីនៅក្បែរកន្លែងកើតហេតុបានឲ្យដឹងថា មុនពេលកើតហេតុមានរថយន្តមួយគ្រឿងម៉ាកព្រូស បើកបរក្នុងទិសដៅពីត្បូងមកជើង លុះដល់ចំណុចកើតហេតុក៏បានជ្រុលចង្កូតទៅបុកជាមួយនឹងម៉ូតមួយគ្រឿងម៉ាក KRISS ពណ៌ក្រហម ពាក់ស្លាកលេខ កណ្តាល 1A-3670 ដែលបើកបរដោយឈ្មោះ ឡុញ រី កំពុងឌុបប្រពន្ធកូន ក្នុងទិសដៅពីជើងទៅត្បូង បណ្តាលឲ្យដួលរងរបួសធ្ងន់ទាំង៣នាក់ ត្រូវបាន រថយន្តស៊ីរ៉ែនរបស់អធិការដ្ឋាននគរបាលក្រុងតាខ្មៅដឹកបញ្ជូនទៅមន្ទីរពេទ្យបង្អែកជ័យជំនះ។ ភ្លាមៗនោះ រថយន្តបង្កហេតុមិនបានឈប់រថយន្តទេ ដោយបានបើករថយន្តទៅមុខទៀត ក៏បានបុកជាមួយម៉ូតូមួយគ្រឿងទៀតម៉ាក FTR ពណ៌ខៀវ ពាក់ស្លាកលេខ ភ្នំពេញ 1BL-8150 ដែលកំពុងបើកបរក្នុងទិសដៅពីត្បូង
មកជើងដោយឈ្មោះ ជា សាហ៊ុយ បន្ថែមទៀតបណ្តាលឲ្យរងរបួសធ្ងន់ ត្រូវបានរថយន្តសង្គ្រោះរបស់មន្ទីរសម្រាកព្យាបាល ហុង ហាក់ នៅក្បែរផ្សារញ៉ែដឹកទៅដើម្បីសង្គ្រោះ។ ចំណែកអ្នកបើកបររថយន្តបង្កវិញបានចុះពីលើរថយន្តរត់គេចខ្លួនបាត់ស្រមោល៕