Post News Media ព័ត៌មានជាតិ សោកស្តាយប៉ុណ្...

សោកស្តាយប៉ុណ្ណាពេលបាត់បង់កូនប្រុសជាទីស្រឡាញ់! រថយន្តក្រុងក្រុមហ៊ុនកាពីតូល បុកក្មេងតូចអាយុ២ខួបម្នាក់ស្លាប់យ៉ាងអាណោចអាធ័ម

ចែកចាយបន្ត

កំពង់ចាម: លោកអធិការរងស្រុកបាធាយ បានប្រាប់ Post News ថា មានករណីគ្រោះថ្នាក់ចរាចរណ៍មួយកើតឡើងរវាងរថយន្តក្រុង និងក្មេងថ្មើរជើង បណ្តាលឲ្យស្លាប់យ៉ាងអាណោចអាធ័ម។

ហេតុការណ៍វេលាម៉ោង៦ល្ងាច ថ្ងៃទី១៤ ខែកក្កដា ឆ្នាំ២០១៧ នៅលើកំណាត់ផ្លូវជាតិលេខ៦A ត្រង់ចំណុច ភូមិភ្នំដិល ឃុំតាំក្រាំង ស្រុកបាធាយ ខេត្តកំពង់ចាម។

បង្កឡើងដោយរថយន្តក្រុង១គ្រឿង ពណ៌សរខៀវ ពាក់ស្លាកលេខ ភ្នំពេញ3B- 7141ជាក្រុមហ៊ុនកាពីតូល ទេសចរណ៍ បើកបរដោយឈ្មោះ អឿន ធារី ភេទប្រុស អាយុ៣៤ឆ្នាំ ស្នាក់នៅ ភូមិឡឥដ្ឋ ឃុំព្រែកដំបង ស្រុកមុខកំពូល ខេត្តកណ្តាលក្នុងទិសដៅពីលិចទៅកើត លុះមកដល់ចំណុចកើតហេតុខាងលើបានបុកក្មេងប្រុសថ្មើរជើងម្នាក់ ឈ្មោះ គឿន នុរាជ អាយុ២ឆ្នាំ ស្នាក់នៅភូមិភ្នំដិល ឃុំតាំងក្រាំង ស្រុកបាធាយ ខេត្តកំពង់ចាម ដែលរត់ឆ្លងថ្នល់មានទិសដៅពីត្បូងទៅជើង បណ្ដាលឲ្យរងរបួសធ្ងន់ ក្រោយមកបានស្លាប់ពេលបញ្ជូនទៅមន្ទីពេទ្យភ្នំពេញ។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយករថយន្តមករក្សាទុក រង់ចាំការដោះស្រាយគ្នាពេលក្រោយ។ ចំណែកសាកសពក្មេងប្រុស ត្រូវបានក្រុមគ្រួសារយកទៅធ្វើបុណ្យតាមប្រពៃណី៕