Post News Media ព័ត៌មានជាតិ លោក ហាក់ ហ៊ាន...

លោក ហាក់ ហ៊ាន់៖ តំណាងអយ្យមិនបានសុំឱ្យឃុំខ្លួនប្រធានការិយាល័យអប់រំកែប្រែខេត្តរតនគីរី តែចៅក្រមស៊ើប….

ចែកចាយបន្ត

ភ្នំពេញ: លោក ហាក់ ហ៊ាន់ ព្រះរាជអាជ្ញារង និងជាអ្នកនាំពាក្យអយ្យការអមសាលាខេត្តរតនគិរី បានបញ្ជាក់តាមទូរស័ព្ទនៅព្រឹកថ្ងៃទី១៦ ខែកក្កដា ឆ្នាំ២០១៧នេះថា កាលពីថ្ងៃទី១៤ ខែកក្កដា ឆ្នាំ២០១៧កន្លងទៅ តុលាការខេត្តរតនគិរីពិតជាបានចេញដីកាសម្រេចឃុំខ្លួនលើឈ្មោះ ខ្យាល ប៉ាង៉ាង ភេទប្រុស អាយុ៥២ឆ្នាំ ជនជាតិគ្រឹង រស់នៅភូមិ២ ឃុំល្អក់ ស្រុកអូរជុំ ខេត្តរតនគីរី មានតួរនាទីជា នាយការិយាល័យ អប់រំកែប្រែ នៃពន្ធនាគារខេត្តរតនគីរី នោះមែន។

អ្នកនាំពាក្យរូបនេះ បានអះអាងថា ការសម្រេចឃុំខ្លួនជនត្រូវចោទខាងលើ ជាឆន្ទានុសិទ្ធិរបស់ចៅក្រមស៊ើបសួរ ខណ:ដែលតំណាងអយ្យការមិនបានស្នើសុំឱ្យឃុំនោះទេ ពោលគឺបានស្នើឱ្យដាក់ជនត្រូវចោទនៅក្រោមការត្រួតពិនិត្យ តាមផ្លូវតុលាការ។

ទោះជាយ៉ាងណា លោក ហាក់ ហ៊ាន់ មិនបានបញ្ជាក់ពីឈ្មោះ តំណាងអយ្យការ និងបទចោទប្រកាន់លើឈ្មោះ ខ្យាល ប៉ាង៉ាង បានទេ ដោយលោកឆ្លើយលក្ខណ:ដោះសារថា លោកនៅស្រុកកំណើត មិនសូវមានសេវាទូរស័ព្ទ ដូច្នេះលោកមិនដឹងរឿងទេ បើចង់ដឹងច្បាស់ទៅសួរខាងអ្នកនាំពាក្យតុលាការ។

ដោយឡែកលោក កែវ ពិសុទ្ធ អ្នកនាំពាក្យតុលាការខេត្តរតនគគិរី បានឱ្យដឹងតាមទូរស័ព្ទនៅព្រឹកថ្ងៃទី១៦ ខែកក្កដា ឆ្នាំ២០១៧នេះផងដែរថា លោក ឈុន ច័ន្ទសីហា ចៅក្រមស៊ើបសួរនៃសាលាដំបូងខេត្តរតនគិរី ពិតជាបានចេញដីកា ឃុំខ្លួនលើឈ្មោះ ខ្យាល ប៉ាង៉ាង ប្រាកដមែន។

អ្នកនាំពាក្យរូបនេះ ក៏មិនបានបញ្ជាក់ច្បាស់លាស់អំពីឈ្មោះ តំណាងអយ្យការកាន់សំណុំរឿង និងបទចោទប្រកាន់លើជនត្រូវចោទដែរ ដោយអះអាងថា លោកមិនទាន់បានមើលឯកសារ ចាំលើកទៅមើលឯកសារសិនបានអាចប្រាប់បាន។

បើយោងតាមការចុះផ្សាយរបស់សារព័ត៌មានក្នុងស្រុក ដោយយោងប្រភពពីមន្ត្រីសាលាដំបូងខេត្តរតនគិរី បានបញ្ជាក់ថា ជនត្រូវចោទឈ្មោះ ខ្យាល ប៉ាង៉ាង ភេទប្រុស អាយុ ៥២ឆ្នាំ ជនជាតិគ្រឹង រស់នៅភូមិ២ ឃុំល្អក់ ស្រុកអូរជុំ ខេត្តរតនគីរី មានតួរនាទីជា នាយការិយាល័យ អប់រំកែប្រែ នៃពន្ធនាគារខេត្តរតនគីរី ត្រូវបានតុលាការសម្រេចឃុំខ្លួនបណ្តោះអាសន្ននៅពន្ធនាគារខេត្តស្ទឹងត្រែង ក្រោមបទចោទប្រកាន់ ជួយសម្រួលដល់ការលួចរត់ ដោយអ្នកត្រួតពិនិត្យ ប្រព្រឹត្តកាលពីម៉ោង ២ និង១០នាទីយប់ថ្ងៃទី២៥ ឈានចូលថ្ងៃទី២៦ ខែឧសភា ឆ្នាំ២០១៧ នៅចំណុចពន្ធនាគារខេត្តរតនគីរី យោងតាមមាត្រា ៥៦៧ នៃក្រមព្រហ្មទណ្ឌ ដែលអាចប្រឈមការជាប់ពន្ធនាគារពី ៥ឆ្នាំ ទៅ១០ឆ្នាំ។

គួររំលឹកថា កាលពីវេលាម៉ោង២ និង១០នាទីយប់ថ្ងៃទី២៥ ឈានចូលថ្ងៃទី២៦ ខែឧសភា ឆ្នាំ២០១៧ កន្លងទៅ មានករណីអ្នកទោសចំនួន ៥នាក់លួចរត់ចេញពីពន្ធនាគារខេត្តរតនគីរី។ នៅយប់កើតហេតុ មន្ត្រីអនុរក្សពន្ធនាគារ បានដេញតាមចាប់បានអ្នកទោសដែលលួចរត់នោះ ម្នាក់មកវិញភ្លាមៗ។

ក្រោយមកទៀត នៅថ្ងៃទី០៦ ខែមិថុនា ឆ្នាំ២០១៧ សមត្ថកិច្ចចាប់បានអ្នកទោសដែលលួចរត់ ម្នាក់ទៀតនៅ ស្រុកវើនសៃ។

ក្រោយការសាកសួររបស់សមត្ថកិច្ច អ្នកទោសទាំង២នាក់ បានឆ្លើយថា ជនត្រូវចោទឈ្មោះ ខ្យាល ប៉ាង៉ាង ជានាយការិយាល័យ អប់រំកែប្រែ ជាអ្នកសម្របសម្រួលឱ្យពួកគេរត់ចេញពីពន្ធនាគារ។

សូមបញ្ជាក់ថា រហូតមកដល់ពេលនេះ នៅមានអ្នកទោសចំនួន ៣នាក់ទៀត ដែលសមត្ថកិច្ចមិនទាន់ចាប់ខ្លួនបាន និងកំពុងស្រាវជ្រាវតាមចាប់ខ្លួនយកមកវិញ៕