Post News Media ព័ត៌មានជាតិ សុំលុយប្រពន្ធ...

សុំលុយប្រពន្ធយកទៅផឹកស្រា ប្រពន្ធមិនព្រមឲ្យ ក៏យកបាយកំពុងដាំមិនទាន់ជញ្ជាត់ទឹក ចាក់លើក្បាលប្រពន្ធ បណ្តាលឲ្យរលាកផ្ទៃមុខ

ចែកចាយបន្ត

កណ្តាល: នារីម្នាក់បានរងរបួសរលាកមុខពេញផ្ទៃមុខ ខណ:ដែលប្តីរបស់ខ្លួន សុំលុយយកទៅផឹកស្រាមិនបាន ក៏ផ្ទុះជាហិង្សាយកបាយកំពុងដាំមិនទាន់ជញ្ជាត់ទឹក ចាក់លើក្បាលប្រពន្ធ។

ហេតុការណ៍នេះ បានកើតឡើងកាលពីវេលាម៉ោង១៦ និង០០នាទី ថ្ងៃទី១១ ខែសីហា ឆ្នាំ២០១៧
នៅចំណុចទំនប់៣៨ ក្នុងភូមិព្រែកខ្នាច ឃុំលើកដែក ស្រុកកោះធំ ខេត្តកណ្តាល។

ជនរងគ្រោះ ឈ្មោះ ឃាង ឡា ភេទស្រី អាយុ៣៣ឆ្នាំ ជនជាតិខ្មែរ មានទីលំនៅ ភូមិព្រែកខ្នាច ឃុំលើកដែក ស្រុកកោះធំ ខេត្តកណ្ដាល មុខរបរ នេសាទ រងរបួសត្រង់មុខខាងស្ដាំ (ប្រពន្ធ)។ ចំណែកជនសង្ស័យ ឈ្មោះ ខ្លូន ខ្លុង ភេទប្រុស​ (ប្ដី) អាយុ៣៤ឆ្នាំ​​ ជនជាតិខ្មែរ ​មានទីលំនៅភូមិព្រែកខ្នាច ឃុំលើកដែក ស្រុកកោះធំ ខេត្តកណ្ដាល មុខរបរ នេសាទ ត្រូវបានសមត្ថកិច្ចឃាត់ខ្លួន ។

នគរបាលស្រុកកោះធំ បានប្រាប់ឲ្យដឹងថា នៅមុនពេលកើតហេតុ ជនសង្ស័យឈ្មោះ ខ្លូន ខ្លុង បានសុំលុយប្រពន្ ធ(ជនរងគ្រោះ) ចំនួន ៥,០០០៛ ទៅលេងល្បែងបុកប៊ីយែ រួចហើយផឹកស្រាសស្រវឹងជោកជាំនៅទីនោះ ។ ក្រោយពីលេងល្បែងចាញ់ និងផឹកស្រាអស់លុយផងនោះ ជនសង្ស័យ ក៏បានត្រលប់មកផ្ទះ សុំលុយប្រពន្ធថែមទៀត ដោយប្រពន្ធគ្មានលុយឲ្យស្រាប់តែជនសង្ស័យបាន លើកឆ្នាំងបាយដែលនៅលើចង្ក្រាន ទៅចាក់ដាក់លើក្បាលប្រពន្ធ បណ្ដាលឲ្យរងរបួសរលាកពេញផ្ទៃមុខខាងស្ដាំ ។

ក្រោយមកជនរងគ្រោះ បានដាក់ពាក្យបណ្ដឹងមកកាន់ប៉ុស្ដិ៍រដ្ឋបាលលើកដែក ឲ្យជួយអន្តរាគមន៍។ បន្ទាប់ពីទទួលបានបណ្ដឹងភ្លាម កម្លាំងនគរបាលប៉ុស្ដិ៍លើកដែក បានចុះដល់កន្លែងកើតហេតុ រួចនាំខ្លួន ជនសង្ស័យ ខ្លូន ខ្លុង បញ្ជូនមកកាន់អធិការដ្ឋាននគរបាលស្រុកកោះធំ ដើម្បីចាត់ការបន្តតាមនីតិវិធី ៕