Post News Media ព័ត៌មានជាតិ សមត្ថកិច្ចកំព...

សមត្ថកិច្ចកំពុងតាមចាប់ជនសង្ស័យម្នាក់ ពាក់ព័ន្ធករណីប៉ុនប៉ងមនុស្សឃាត មិនបានសម្រេចនៅស្រុកកៀនស្វាយ

ចែកចាយបន្ត

កណ្តាល: យុវជនម្នាក់ ត្រូវបានជនសង្ស័យបាញ់នឹងកាំភ្លើងប៉ុនប៉ងមនុស្សឃាត(បាញ់នឹងអាវុធខ្លី)ហេតុការណ៍ដ៏ព្រៃផ្សៃនេះបានកើតឡើងនៅវេលាម៉ោង១០និង៣០នាទី ថ្ងៃទី១ ខែតុលា ឆ្នាំ២០១៧ នៅចំណុចលើផ្លូវលំទំនប់ដីចិន ក្នុងភូមិឬស្សីស្រុកទី២ ឃុំឈើទាល ស្រុកកៀនស្វាយ ខេត្តកណ្ដាល។

សមត្ថកិច្ចបានឲ្យដឹងថាជនរងគ្រោះមានឈ្មោះ ញ៉ាន ពិសី ភេទប្រុស អាយុ១៩ឆ្នាំ មុខរបរកសិករ មានទីលំនៅភូមិឬស្សីស្រុកទី២ ឃុំឈើទាល ស្រុកកៀនស្វាយ ខេត្តកណ្តាល រងរបួសកំភួនដៃស្ដាំ ធ្លាយមកត្រូវពោះខាងស្ដាំ។

ចំណែកជនសង្ស័យម្នាក់ឈ្មោះ ឌី វីរ: ហៅតាក់ ភេទប្រុស
អាយុ២៥ឆ្នាំ មុខរបរមិនពិតប្រាកដ មានទីលំនៅភូមិឃុំកើតហេតុខាងលើ (រត់គេចខ្លួន) និងជាមុខសញ្ញាចេញពីពន្ធនាគារ ពីបទជួញដូរគ្រឿងញៀន ។ វត្តុតាងចាប់យកក្បាលគ្រាប់កាំភ្លើងខ្លី១គ្រាប់។

សមត្ថកិច្ចបានបន្តថានៅវេលាកើតហេតុខាងលើជនរងគ្រោះបានទៅស៊ីឈ្នួលលីផ្លែចេកស្ទងរបស់ឈ្មោះ ម៉ៅ ស៊ីនឿន ហៅគាំង ភេទប្រុស អាយុ២៩ឆ្នាំ មុខរបរកសិករ មានទីលំនៅភូមិ ឃុំកើតហេតុខាងលើ ពេលលីផ្លែចេកអស់ជនរងគ្រោះបានដើរត្រឡប់មកផ្ទះវិញ ស្រាប់តែជនសង្ស័យបានយកកាំភ្លើងខ្លី
មិនស្គាល់ម៉ាកបាញ់ជនរងគ្រោះមួយគ្រាប់បណ្ដាលឲ្យរងរបួសធ្ងន់រួចជិះម៉ូតូម៉ាកនិច ពណ៌ក្រហមគេចខ្លួនបាត់ ។

រីឯជនរងគ្រោះត្រូវបានឈ្មោះ ម៉ៅ ស៊ីនឿន និងឈ្មោះ ពុំ បញ្ញា ហៅ យ៉ែ នាំយកមកព្យាបាលនៅពេទ្យឯកជនឈ្មោះ ចំរើន បន្ទាប់មកក្រុមគ្រួសារបានបញ្ជូនជនរងគ្រោះទៅព្យាបាលបន្តនៅមន្ទីរពេទ្យកាល់ម៉ែត រាជធានីភ្នំពេញ។
ករណីខាងលើនេះកម្លាំងផ្នែកជំនាញស្រុក រួមសហការជាមួយកម្លាំងប៉ុស្តិ៍ឈើទាល និងអាជ្ញាធរមូលដ្នានភូមិឃុំ កសាងសំណុំ រឿងតាមនីតិវិធី៕