Post News Media ព័ត៌មានជាតិ សមត្ថកិច្ចកម្...

សមត្ថកិច្ចកម្ពុជា ឃាត់ខ្លួនជនបរទេសចំនួន ៩៣នាក់ ស្រី១៧នាក់ ពាក់ព័ន្ធករណីគំរាមទារប្រាក់តាមប្រព័ន្ធអ៊ិនធឺណេត នៅខេត្តព្រះសីហនុនិងរាជធានីភ្នំពេញ

ចែកចាយបន្ត

ភ្នំពេញ: កាលពីវេលាម៉ោង ៩ និង ៥៥ នាទីព្រឹក ថ្ងៃទី៥ ខែតុលា ឆ្នាំ២០១៧នាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ ដឹកនាំដោយលោក សៀង សុខ ព្រះរាជអាជ្ញារងអមសាលាដំបូង រាជធានីភ្នំពេញ និងលោក លឹម ប៊ុនហេង ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ សហការជាមួយនាយកដ្ឋានប្រឆាំងបទល្មើសល្បែងពាណិជ្ជកម្ម នៃអគ្គស្នងការដ្ឋាននគរបាលជាតិ និង ស្នងការដ្ឋាននគរបាលខេត្តព្រះសីហនុ រាជធានីភ្នំពេញ សមត្ថកិច្ចដែនដី និងអាជ្ញាធរមូលដ្ឋាន បានចុះត្រួតពិនិត្យ និងឆែកឆេរករណីគំរាមទារប្រាក់តាមប្រព័ន្ធអ៊ិនធឺណេត និងអនឡាញ នៅគោលដៅរាជធានីភ្នំពេញនិង ខេត្តព្រះសីហនុ មានចំនួន៩ទីតាំង។

ជាលទ្ធផល បានត្រួតពិនិត្យ និងឆែកឆេររកឃើញមានជនបរទេសចំនួន ៩៣នាក់ ស្រី១៧នាក់ មាន២សញ្ជាតិ ក្នុងនោះ
-ជនជាតិឥណ្ឌូនេស៊ីចំនួន៧នាក់ ស្រីម្នាក់
-ជនជាតិចិនចំនួន ៨៤ នាក់ ស្រី ១៦នាក់

សម្ភារ:ជាវត្ថុតាងដែលបានដកហូតរួមមាន កុំព្យូទ័រយួរដៃចំនួន១៣២គ្រឿង,កុំព្យូទ័រលើតុចំនួន៣៤គ្រឿង, ទូរសព្ទដៃចំនួន ២០៩ គ្រឿង,ដុំវ៉ាយហ្វាយចំនួន១៤គ្រឿង និងសម្ភារ:បណ្តាញណេតវឺកមួយចំនួន។

ក្រុមប្រតិបត្តិការចម្រុះសម្រេចបញ្ជូនជនបរទេសចំនួន៩៣ នាក់ ស្រី១៧ នាក់ និងដកហូតសម្ភារ:ខាងលើ មកកាន់អគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារតាមនីតិវិធី៕