Post News Media ព័ត៌មានជាតិ ពស់ថ្លាន់ធំ១ក...

ពស់ថ្លាន់ធំ១ក្បាលជិត២០គីឡូក្រាម លូនឡើងលើដំបូលផ្ទះជួលបង្កការភ្ញាក់ផ្អើលទាំងព្រឹក!

ចែកចាយបន្ត

ភ្នំពេញ: ប្រជាពលរដ្ឋមានការភ្ញាក់ផ្អើលបន្ទាប់ពីមានពស់ថ្លាន់ធំ១ក្បាលលូនឡើងទៅសម្ងំនៅលើដំបូលផ្ទះជួល មួយកន្លែងដែលកម្មការិនីរោងចក្រកាត់ដេរជួលស្នាក់នៅ ហើយពួកគាត់បាននាំគ្នាទៅចោមរោមមើល គ្រប់ៗគ្នាផងដែរ។

ហេតុការណ៍កើតឡើងនៅវេលាម៉ោង៥ និង៣០នាទីព្រឹក ថ្ងៃទី៧ ខែតុលា ឆ្នាំ២០១៧ នៅក្នុង ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពពីប្រជាពលរដ្ឋខាងលើនោះបានបន្តទៀតថា ពស់ថ្លាន់១ក្បាលនោះ មានទំហំដងខ្លួនប៉ុនកំភ្លួនជើងមនុស្សចាស់ និងប្រវែងប្រហែលជាង៣ម៉ែត្រ និងទម្ងន់ប្រមាណ២០គីឡូក្រាម ហើយមិនដឹងថាពស់នេះបានលូនចូលទៅក្នុងបន្ទប់ជួលនោះតាំងពីពេលណាឡើយ។ ហើយនៅក្នុងបន្ទប់នោះមានកម្មការិនីម្នាក់ស្នាក់នៅម្នាក់ឯងហើយមិនដឹងថាពស់នេះលូនចូលទៅក្នុងបន្ទប់ជួលខាងលើ តាំពីពេលណានោះទេ ដោយនៅមុនពេលមានការភ្ញាក់ផ្អើលកើតឡើង មានកំប៉ុងមួយជ្រុះមកលើឥដ្ឋការូ ខណ:ធ្វើឲ្យនាងភ្ញាក់ពីដំណេក ដោយមានការងឿងឆ្ងល់នាងកម្មការិនីម្នាក់នោះ ក៏បានបើកភ្លើងមើលក៏បានប្រទះឃើញពស់ថ្លាន់១ក្បាលនេះស្ថិតនៅក្នុងបន្ទប់ទៅហើយ។

ប្រភពដដែលបានបន្តទៀតថា ខណ:នោះនាងកម្មការិនីខាងលើបានស្រែកឆោរឡោ និងរត់ចេញពីក្នុងបន្ទប់ទាំងការភិតភ័យតក់ស្លុត ឲ្យអ្នកជិតខាងជួយដែលបង្កឲ្យមានការភ្ញាក់ផ្អើលយ៉ាងខ្លាំងទាំងព្រឹកតែម្ដង ពេលនោះអ្នកជិតខាងបាននាំគ្នាទៅមើលគ្រប់ៗគ្នា ហើយម្ចាស់ផ្ទះជួលបាប់ដែរ តែទាញមិនឈ្នះទេ។បន្ទាប់មកពស់បានលូនឡើងទៅលើដំបូលបន្ទប់ជួលពីបន្ទប់មួយទៅកាន់បន្ទប់មួយទៀត ដោយមិនបានលូនចេញទៅកន្លែងណាផ្សេងទៀតឡើយ។ បន្ទាប់មកគេបានរាយការណ៍ជូនអាជ្ញាធរភូមិ ដើម្បីរាយការណ៍បន្តទៅកាន់អាជ្ញាធរសង្កាត់ និងខណ្ឌឲ្យចាប់ពស់នេះយកទៅរក្សាទុករង់ចាំប្រគល់ជូនបន្តទៅឲ្យខាងក្រុមអភិរក្សសត្វព្រៃ មន្ត្រីរដ្ឋបាលព្រៃឈើ យកទៅដាក់នៅសួនសត្វ ប៉ុន្តែរហូតដល់វេលាថ្ងៃត្រង់ថ្ងៃដដែលនោះនៅមិនទាន់ឃើញមានមន្ត្រីណាម្នាក់ទៅចាប់ពស់នោះចេញនៅឡើយទេ៕