Post News Media ព័ត៌មានជាតិ ចោរដៃរហ័ស២នាក...

ចោរដៃរហ័ស២នាក់ ឆក់កាបូបស្រីស្អាតមិនសម្រេច ត្រូវកម្លាំងអាវុធហត្ថឃាត់ខ្លួន

ចែកចាយបន្ត

ភ្នំពេញ: ជនសង្ស័យចំនួន២នាក់ ត្រូវបានកម្លាំងអាវុធហត្ថរាជធានីភ្នំពេញ ធ្វើការឃាត់ខ្លួនបាន កាលពីវេលាម៉ោង១រំលងអាធ្រាត ថ្ងៃទី៩ ខែតុលា ឆ្នាំ២០១៧ ឃាត់ខ្លួនបានក្រោយពីឆក់កាបូប នៅចំណុចផ្លូវលេខ១៧២ កែងផ្លូវ៥១ សង្កាត់ផ្សារថ្មីទី៣ ខណ្ឌដូនពេញ ។

ជនសង្ស័យទាំង២នាក់ ទី១មានឈ្មោះ សូ គឹមសាន់ ហៅគក់ ភេទប្រុស អាយុ ២៣ឆ្នាំ , ទី២/ ឈ្មោះ យឹម ឌីម ភេទប្រុស អាយុ ២៣ឆ្នាំ បានធ្វើសកម្មភាពឆក់កាបូបស្ពាយ ពីនារីជនរងគ្រោះ ឈ្មោះ ហឿន ស៊ានហ៊ន់ ភេទស្រី អាយុ ១៦ឆ្នាំ មុខរបរចុងភៅ ខណ:ពេលដែលជនរងគ្រោះ ចេញពីធ្វើការនៅផ្សារកុងទីន័រ ដោយជិះម៉ូតូ ១គ្រឿង ម៉ាក ធូដេ ជាមួយឈ្មោះ ឌី (អ្នកធ្វើការជាមួយគ្នា) ក្នុងគោលបំណងទៅហូបអាហារនៅម្តុំផ្សារសូរិយ៉ាមល លុះពេលជិះដល់ចំណុចផ្លូវ១៧២ ក៏មានជនសង្ស័យមានគ្នា ២នាក់ ជិះម៉ូតូ ១គ្រឿង ម៉ាក ស្មាសរីវ៉៉ូ ពណ៌ខ្មៅ តាមក្រោយខ្លួន ភ្លាមនោះ ពួកគេទាំង២នាក់ ក៏បានធ្វើសកម្មភាព ឆក់ កាបូប របស់ខ្លួនតែម្តង បន្ទាប់ពីធ្វើសកម្មភាពឆក់បានសម្រេចហើយ ពួកគេបានជិះគេចខ្លួនតាមបណ្តោយផ្លូវ១៧២ ពីកើត ទៅលិច ស្របពេលដែលកម្លាំងល្បាតអាវុធហត្ថឃើញ សកម្មភាពពួកគេ ក៏ប្រដេញតាមភ្លាមៗ រហូតឈានដល់ការឃាត់ខ្លួន បានជនសង្ស័យ២នាក់ទាំងនាក់នេះតែម្តង ។

តាមចម្លើយសារភាពរបស់ជនសង្ស័យទាំង២នាក់ ខាងលើ បានប្រាប់សមត្ថកិច្ចអាវុធហត្ថឲ្យដឹងដូចគ្នាថា មុនពេលធ្វើសកម្មភាព ពួកគេបានផឹកស៊ីនៅតាខ្មៅ និងចាក់អង្រែលើ បន្ទាប់មកក៏មកផឹកស៊ីនៅកោះពេជ្របន្តទៀត ក្រោយពេលផឹកស៊ីរួច ពួកគេទាំង២នាក់ បានជិះម៉ូតូ ១គ្រឿង ម៉ាកស៊ុយសាគីស្មាសរីវ៉ូ ពណ៌ខ្មៅ ស្លាកលេខ ភ្នំពេញ 1X-6993 ជុំវិញវិមានឯករាជ្យ ដោយសំដៅទៅលេងក្លឹប ហាត នៅពេលជិះដល់ផ្លូវ១៧២ កែង៥១ ស្រាប់តែឃើញជនរងគ្រោះជិះម៉ូតូម៉ាក ធូដេ មានគ្នា២នាក់ ឃើញ ឳកាសល្អ ពួកគេបានជិះម៉ូតូទៅក្បែរម៉ូតូជនរងគ្រោះ ដែលកំពុង ឌុបគ្នា ក៏បានធ្វើសកម្មភាព ឆក់ កាបូប ពីជនរងគ្រោះ ដែលអង្គុយខាងក្រោយបានសម្រេចតែម្តង ស្របពេលដែលកម្លាំងអាវុធហត្ថល្បាត ឃើញ ក៏ប្រដេញតាមបង្ក្រាបបាន ជនសង្ស័យទាំង២នាក់ ខាងលើ ភ្លាមៗផងដែរ។ចំណែកកាបូបស្ពាយ ដែលអាវុធហត្ថដកហូតបានពីជនល្មើស ត្រូវបានប្រគល់ជូនម្ចាស់ដើមវិញ(នារីជនរងគ្រោះ)។

បច្ចុប្បន្ន ជនសង្ស័យទាំង ២នាក់ ខាងលើ ត្រូវបានសមត្ថកិច្ចជំនាញនៃការិយាល័យបង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ កំពុងធ្វើសំណុំរឿងបញ្ជូនទៅតុលាការ ដើម្បីផ្តន្ទាទោសតាមនិតិវិធីច្បាប់៕