Post News Media ព័ត៌មានជាតិ រកឃើញហើយ ចោរទ...

រកឃើញហើយ ចោរទាក់ឆ្កែ! ពេលនេះ ជាប់ខ្នោះប៉ូលិស!

ចែកចាយបន្ត

ភ្នំពេញ: កម្លាំងសមត្ថកិច្ចល្បាតប៉ុស្តិ៍នគរបាលរដ្ឋបាលទឹកថ្លា សហការជាមួយប៉ុស្តិ៍នគរបាលរដ្ឋបាលអូរបែកក្អម បានធ្វើការឃាត់ខ្លួនជនសង្ស័យ ជាអ្នកទាក់ឆ្កែម្នាក់ ក្នុងចំណោមបក្ខពួក៤នាក់ទៀត និងដកហូតបានម៉ូតូ១គ្រឿង។

ហេតុការណ៍នេះកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១២ ខែមករា ឆ្នាំ២០១៨ នៅត្រង់ចំណុចជាប់ខាងត្បូងរបងលាសាដន់ប៊ូស្កូរទឹកថ្លា តាមបណ្តោយផ្លូវលំ ស្ថិកក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ ។

ជនសង្ស័យទី១មានឈ្មោះ សុខ ជូរ ភេទប្រុស អាយុ៤៣ឆ្នាំ មុខរបររត់ម៉ូតូឌុប ស្នាក់នៅភូមិវាលស្បូវ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។

បើតាមសម្តីពីសមត្ថកិច្ចបានឲ្យដឹងថា មុនពេលកើតហេតុ កម្លាំងពួកគាត់បានធ្វើការល្បាតនៅក្នុងមូលដ្ឋានដើម្បីកាត់បន្ថយបទល្មើសផ្សេងៗដែលកើតឡើងដោយប្រការណាមួយ លុះដល់ចំណុចកើតហេតុ ក៏ប្រទះឃើញជនសង្ស័យខាងលើជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FR-2953 និងជនសង្ស័យម្នាក់ទៀតអង្គុយពីក្រោយដោយមានបាវនៅពីមុខ រួមទាំងបក្ខពួក២នាក់ទៀតជិះម៉ូតូមួយគ្រឿងម៉ាក អ៉ិចសាយទ័រ ពណ៌ខៀវ មិនចាំស្លាកលេខ ដោយធ្វើដំណើរតាមបណ្តោយផ្លូវ២០០៤ ក្នុងទិសដៅពីលិចទៅកើត។ ដោយមានការសង្ស័យ កម្លាំងសមត្ថកិច្ចក៏បម្រុងនិងកាត់មុខ ដើម្បីឃាត់ធ្វើការឆែកឆេរ ស្រាប់តែក្រុមជនសង្ស័យឃើញកម្លាំងសមត្ថកិច្ចក៏បានជិះម៉ូតូរត់គេចខ្លួន ហើយកម្លាំងសមត្ថកិច្ចក៏ជិះដេញតាមពីក្រោយរហូតដល់ចំណុចកើតហេតុជនសង្ស័យខាងលើរួមទាំងបក្ខពួកដែលអង្គុយពីក្រោយ បានផ្តួលម៉ូតូចោលហើយព្យាយាមរត់គេចខ្លួន តែត្រូវសមត្ថកិច្ចចាប់ឃាត់ខ្លួនបានម្នាក់និងដកបានឧបករណ៍សម្រាប់ទាក់ឆ្កែមួយនិងម៉ូតូមួយគ្រឿង រីឯម្នាក់ទៀតរត់គេចខ្លួនបាត់ ចំណែកឯបក្ខពួក២នាក់ទៀតបានជិះម៉ូតូរត់គេចខ្លួនបាត់ស្រមោល។

បច្ចុប្បន្នជនសង្ស័យខាងលើនិងវត្ថុតាងត្រូវបានកម្លាំងសមត្ថកិច្ចនាំខ្លួនយកទៅសាកសួរនិងកសាងសំណុំរឿងអធិការដ្ឋាននគរបាលខណ្ឌសែនសុខរង់ចាំបញ្ជូនបន្តទៅតុលាការដើម្បីរង់ចាំការចាត់ការតាមនិតិវិធីច្បាប់បន្តទៀត៕

ចែកចាយបន្ត