ក្រុមចោរស្ទាក់ធាក់ម៉ូតូឲ្យដួលរួចកាន់កាំបិតផ្គាក់ដេញកាប់ប្លន់យ៉ាងសាហាវ ត្រូវសមត្ថកិច្ចតាមក្របួចបាន ២នាក់ ខណៈ ៣នាក់ទៀតរត់គេចខ្លួន

ជនសង្ស័យញៀនថ្នាំចំនួន ២នាក់ ក្នុងចំណោមបក្ខពួក ៥នាក់ ត្រូវបានកម្លាំងសមត្ថកិច្ចស្រាវជ្រាវឃាត់ខ្លួនបានសម្រេច បន្ទាប់ពីពួកគេបានធ្វើសកម្មភាពជិះម៉ូតូស្ទាក់ធាក់ជនរងគ្រោះឲ្យដួល រួចកាន់កាំបិតផ្គាក់ដេញកាប់ដើម្បីប្លន់យកម៉ូតូ។ អំពើប្លន់ប្រដាប់អាវុធយ៉ាងសាហាវនេះ បានកើតឡើងកាលពីម៉ោង ០ និង៥០នាទី រំលងអធ្រាត្រ ថ្ងៃទី១០ កក្កដា ២០២៦ នៅចំណុចផ្លូវលំក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល។

លោកវរសេនីយ៍ឯក មាន សំណាង អធិការនគរបាលស្រុកអង្គស្នួល បានឲ្យដឹងថា ជនសង្ស័យដែលត្រូវឃាត់ខ្លួនមានទី១ ឈ្មោះ ឈុំ វ៉ារ៉ាប៊ី (ប្រុស, ១៩ឆ្នាំ) និងទី២ ឈ្មោះ វិចិត្រ ច័ន្ទដាវីត (ប្រុស, ២៣ឆ្នាំ) ដែលអ្នកទាំងពីរមានមុខរបរមិនពិតប្រាកដ រស់នៅឃុំបែកចាន និងមានសារធាតុញៀនក្នុងទឹកនោមវិជ្ជមានដូចគ្នា ចំណែកបក្ខពួក ៣នាក់ទៀត មិនទាន់ស្គាល់អត្តសញ្ញាណកំពុងរត់គេចខ្លួន។ ដោយឡែក ជនរងគ្រោះមានឈ្មោះ ច្រឹក ភក្តី (ប្រុស, ១៧ឆ្នាំ) ជាកម្មកររោងចក្រ ត្រូវក្រុមចោរធាក់បណ្ដាលឲ្យដួលរលាត់ស្មាខាងឆ្វេង និងរលាត់ក្បាលជង្គង់ទាំងសងខាង។ នៅក្នុងប្រតិបត្តិការនេះ សមត្ថកិច្ចបានដកហូតវត្ថុតាងរួមមាន កាំបិតផ្គាក់ដងឫស្សី ១ដើម ទូរស័ព្ទដៃម៉ាកអាយហ្វូន ៧ ពណ៌ខ្មៅ ១គ្រឿង រួម និងម៉ូតូរបស់ជនរងគ្រោះ ១គ្រឿង ម៉ាកហុងដាឌ្រីមសង់ពណ៌ខ្មៅស៊េរីឆ្នាំ២០២៤ ដែលជនសង្ស័យបានយកទៅប្លុងចោលនៅរោងបុណ្យដោយមានស្នាមកាប់ខូចខាតជាច្រើនកន្លែង។

លោកអធិការបានបន្តថា មុនពេលកើតហេតុ កាលពីម៉ោង ២៣ និង៥០នាទី ថ្ងៃទី៩ កក្កដា ២០២៦ ជនរងគ្រោះ និងមិត្តភក្ដិបានជិះម៉ូតូ ២គ្រឿង មានគ្នា ៣នាក់ ចេញពីផ្ទះជួលឆ្ពោះទៅរាជធានីភ្នំពេញតាមបណ្ដោយផ្លូវជាតិលេខ៤។ លុះដល់ចំណុចកើតហេតុ ស្រាប់តែមានជនសង្ស័យ ៣នាក់ ជិះម៉ូតូ ១គ្រឿង បិទភ្លើងតាមពីក្រោយ រួចធាក់ម៉ូតូជនរងគ្រោះបណ្ដាលឲ្យដួលនៅលើចិញ្ចើមថ្នល់។ ភ្លាមនោះ ជនសង្ស័យបានលើកម៉ូតូបម្រុងជិះចេញទៅ តែដោយសារម៉ូតូបញ្ឆេះមិនឆេះ ទើបពួកគេដកយកតែកូនសោជិះគេចខ្លួនទៅទិសខាងលិច ខណៈជនរងគ្រោះបានរត់ចូលទៅពួនក្នុងការ៉ាស់លក់ហ្គាស។

ពេលស្ងាត់ ជនរងគ្រោះបានចេញមករុញម៉ូតូគ្មានសោនោះចូលទៅក្នុងភូមិត្រពាំងសុក្រំ ស្រាប់តែប្រទះឃើញជនសង្ស័យ ២នាក់ទៀត ជិះម៉ូតូ ១គ្រឿង ម៉ាកស៊ុយហ្ស៊ុយគីនិចមកដល់ ដោយអ្នកជិះក្រោយកាន់កាំបិតផ្គាក់ស្រែកគំរាម ទើបជនរងគ្រោះផ្ដួលម៉ូតូចោលរត់ឡើងជិះម៉ូតូ ១គ្រឿងទៀត របស់មិត្តភក្ដិគេចខ្លួន និងទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបែកចានតែម្ដង។
លោកអធិការបានបញ្ជាក់ថា លុះព្រឹកឡើងកម្លាំងជំនាញស្រុកបានសហការជាមួយកម្លាំងប៉ុស្តិ៍ចុះឆែកកាមេរ៉ាសុវត្ថិភាពរហូតកំណត់មុខសញ្ញាបាន និងឈានដល់ការឃាត់ខ្លួនជនសង្ស័យទាំង ២នាក់ នាំយកមកសួរនាំ។

នៅចំពោះមុខសមត្ថកិច្ច ជនសង្ស័យទាំង ២នាក់ បានឆ្លើយសារភាពថា ក្រុមដែលដេញវាយប្លន់យកម៉ូតូជនរងគ្រោះនោះពិតជាបក្ខពួករបស់ខ្លួនមែន ប៉ុន្តែពួកគេមិនស្គាល់អត្តសញ្ញាណច្បាស់នោះទេ ហើយពួកខ្លួនក៏ជាអ្នកប្រើប្រាស់គ្រឿងញៀនផងដែរ។ បច្ចុប្បន្ន ជនសង្ស័យ រួម និងវត្ថុតាង ត្រូវបានកសាងសំណុំរឿងបញ្ជូនទៅកាន់សាលាដំបូងខេត្តកណ្ដាល ដើម្បីចាត់ការបន្តតាមនីតិវិធីច្បាប់ ខណៈសមត្ថកិច្ចកំពុងតាមប្រមាញ់បក្ខពួក ៣នាក់ទៀត យ៉ាងយកចិត្តទុកដាក់បំផុត៕