ភ្នាក់ងារកត់ឆ្នោតវៀតណាមខុសច្បាប់ម្នាក់សម្ងំធ្វើសកម្មភាពក្នុងផ្ទះ ត្រូវធ្លាក់ចូលអន្ទាក់ច្បាប់

បុរសម្នាក់ដែលបានយកផ្ទះរបស់ខ្លួនធ្វើជាកន្លែងកត់ឆ្នោតវៀតណាមខុសច្បាប់យ៉ាងសកម្ម ត្រូវបានបញ្ចប់អាជីពទុច្ចរិតនេះ បន្ទាប់ពីប្រជាពលរដ្ឋរាយការណ៍ប្រាប់អាជ្ញាធរឲ្យចុះមកដល់កន្លែង។ សកម្មភាពលួចលាក់ប្រកបរបរខុសច្បាប់នេះ ត្រូវបានបែកការណ៍កាលពីម៉ោង ១៤ និង៥០នាទី ថ្ងៃទី១០ កក្កដា ២០២៦ នៅចំណុចផ្ទះជនសង្ស័យ ស្ថិតក្នុងភូមិព្រៃក្រឡាញ់ ឃុំលំហាច ស្រុកអង្គស្នួល ខេត្ដកណ្ដាល។

លោកវរសេនីយ៍ឯក មាន សំណាង អធិការនគរបាលស្រុកអង្គស្នួល បានឲ្យដឹងថា ជនសង្ស័យដែលត្រូវបានឃាត់ខ្លួនមានឈ្មោះ សម្បត្តិ រតនៈ (ប្រុស, ២៨ឆ្នាំ) ជាបុគ្គលិកក្រុមហ៊ុនកត់ឆ្នោត រស់នៅភូមិព្រៃក្រឡាញ់ ឃុំលំហាច ដោយជននេះគ្មានសារធាតុញៀនក្នុងទឹកនោមនោះទេ។ នៅក្នុងប្រតិបត្តិការនេះ សមត្ថកិច្ចបានដកហូតវត្ថុតាងរួមមាន ប្រាក់រៀលចំនួន ១០ម៉ឺន៥រយរៀល ក្រដាសកត់លេខឆ្នោតគៀបភ្ជាប់ជាមួយក្រដាសកាបូនចំនួន ៣ដុំ និងទូរស័ព្ទដៃចំនួន ២គ្រឿង (ម៉ាកអាយហ្វូនអ៊ិចពណ៌ស ១គ្រឿង និងម៉ាកអាយហ្វូន១១ប្រូម៉ាក់ ១គ្រឿង)។

លោកអធិការបានបន្តថា មុនពេលឈានដល់ការឃាត់ខ្លួន កម្លាំងសមត្ថកិច្ចទទួលបានព័ត៌មានពីប្រជាពលរដ្ឋថានៅចំណុចផ្ទះខាងលើមានបើកលេងល្បែងស៊ីសងខុសច្បាប់ប្រភេទកត់ឆ្នោតវៀតណាម។ ក្រោយទទួលបានសេចក្ដីរាយការណ៍ លោក សាន វ៉ានធុល អភិបាលរង និងជាតំណាងលោកអភិបាលស្រុក បានដឹកនាំកម្លាំងអាជ្ញាធរពាក់ព័ន្ធ សហការជាមួយកម្លាំងផ្នែកជំនាញ និងកម្លាំងប៉ុស្ដិ៍នគរបាលរដ្ឋបាលលំហាច ចុះទៅដល់ទីតាំងកើតហេតុ រួចធ្វើការឃាត់ខ្លួនជនសង្ស័យតែម្ដង។

លោកអធិការបានបញ្ជាក់ថា នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើជាបុគ្គលិកកត់ឆ្នោតវៀតណាមនេះរយៈពេល ២ខែ មកហើយ ដោយក្នុង ១ថ្ងៃ ខ្លួនកត់ឆ្នោតបានប្រាក់ចន្លោះពី ១០ម៉ឺនរៀល ទៅ ២០ម៉ឺនរៀល។ បច្ចុប្បន្ន ជនសង្ស័យ រួម និងវត្ថុតាង ត្រូវបាននាំយកមកកាន់អធិការដ្ឋាននគរបាលស្រុកអង្គស្នួល ដើម្បីកសាងសំណុំរឿងចាត់ការបន្តតាមនីតិវិធីច្បាប់៕