Update ៖ កម្លាំងទីបញ្ជាការជួរមុខ រកឃើញសាកសពបុរសបាត់ខ្លួននៅក្រោមស្ពានកោះពស់ហើយ

(ព្រះសីហនុ) ៖ នៅវេលាម៉ោង ០៧:៣៥នាទីព្រឹក ថ្ងៃទី២២ ខែកក្កដា ឆ្នាំ២០២៦ កម្លាំងទីបញ្ជាការជួរមុខបានប្រទះឃើញសាកសពជនរងគ្រោះ នៅចំណុចនិយាមកា Lat: 10°33’18″N, Long: 103°33’21″E ស្ថិតនៅជិតស្ពានអូត្រេះ។

បច្ចុប្បន្ន សាកសពជនរងគ្រោះត្រូវបានប្រគល់ជូនសមត្ថកិច្ច និងមន្រ្តីជំនាញព្រមទាំងក្រុមគ្រូពេទ្យត្រួតពិនិត្យនិងធ្វើកោសល្យវិច្ច័យ មុននឹងប្រគល់ជូនក្រុមគ្រួសារ និងសាច់ញាតិយកទៅរៀបចំពិធីបុណ្យតាមប្រពៃណី។

សូមជម្រាបថា ក្រោមការយកចិត្តទុក និងបទបញ្ជាផ្ទាល់របស់ ឯកឧត្តម ឧត្តមនាវីទោ លី ហួត មេបញ្ជាការទីបញ្ជាការជួរមុខ នៅវេលាម៉ោង០៦:៣០នាទី ថ្ងៃទី២២ ខែកក្កដា ឆ្នាំ២០២៦ កម្លាំងទីបញ្ជាការជួរមុខ ចំនួន ០៨រូប ដឹកនាំដោយ វរនាវីត្រី គួប ពិន មេបញ្ជាការរងកងនាវាអន្តរាគមន៍ បានប្រើប្រាស់មធ្យោបាយអូប័រចំនួន ០២គ្រឿង (RIHB លេខ១៣៣ និងអូប័រ ៦០សេះ របស់ស្នាក់ការសន្តិសុខកោះតាង) បន្តចេញប្រតិបត្តិការស្វែងរកជនរងគ្រោះឈ្មោះ ផែន សុខហេង ភេទប្រុស អាយុ ៣២ឆ្នាំ ដែលបានចុះមុជទឹកបាញ់ត្រីនៅក្រោមស្ពានកោះពស់ ហើយបាត់ខ្លួនកាលពីថ្ងៃទី២០ ខែកក្កដា ឆ្នាំ២០២៦ ៕