រដ្ឋបាលរាជធានីភ្នំពេញ៖ ប្រជាពលរដ្ឋក្រីក្រ ទុរគតជន និងជនអនាថា នឹងទទួលបានសេវាបូជាសពដោយឥតគិតថ្លៃ

ភ្នំពេញ៖ រដ្ឋបាលរាជធានីភ្នំពេញ បានបញ្ជាក់ថា ប្រជាពលរដ្ឋដែលមានជីវភាពខ្វះខាត ទុរគតជន និងជនអនាថា នឹងទទួលបានសេវាបូជាសពដោយឥតគិតថ្លៃ ហើយក្នុងករណីខ្វះខាតខ្លាំង រហូតគ្មានក្តារមឈូស រដ្ឋបាលរាជធានីក៏នឹងផ្តល់ជូនផងដែរ។

ការបញ្ជាក់នេះ ធ្វើឡើងដោយលោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ នារសៀលថ្ងៃទី២២ ខែកក្កដា ឆ្នាំ២០២៦។

ការលើកឡើងនេះ ធ្វើឡើងបន្ទាប់ពីថ្មីៗនេះ មានការផ្សព្វផ្សាយតារាងតម្លៃសេវាបូជាសពនៅតាមវត្តមួយចំនួន ដែលបង្កឱ្យមានការចាប់អារម្មណ៍ និងវែកញែកនៅលើបណ្តាញសង្គម ទោះបីជាព្រះគ្រូចៅអធិការវត្តពាក់ព័ន្ធបានចេញសេចក្តីបំភ្លឺរួចហើយក៏ដោយ។

លោកស្រី ដោ សម្ផស្ស បានបញ្ជាក់ថា ក្នុងករណីប្រជាពលរដ្ឋមានជីវភាពខ្វះខាត ទុរគតជន ឬជនអនាថា រដ្ឋបាលរាជធានីភ្នំពេញនឹងរៀបចំសេវាបូជាសពជូនដោយមិនទុកឱ្យជួបការលំបាកនោះឡើយ។ ចំពោះគ្រួសារដែលខ្វះខាតខ្លាំង រហូតគ្មានលទ្ធភាពទិញក្តារមឈូស រដ្ឋបាលរាជធានីក៏នឹងផ្តល់ជំនួយផងដែរ។

រដ្ឋបាលរាជធានីភ្នំពេញ អំពាវនាវដល់ប្រជាពលរដ្ឋដែលមានតម្រូវការជំនួយ អាចទាក់ទងទៅអាជ្ញាធរមូលដ្ឋាននៅសង្កាត់ ឬខណ្ឌដែលនៅជិតបំផុត ឬទាក់ទងមកកាន់ Hotline 1299 ដើម្បីទទួលបានការជួយអន្តរាគមន៍ទាន់ពេលវេលា៕