Post News Media ព័ត៌មានកីឡា Leonardo Vito...

Leonardo Vitorino៖ មកពីជម្រើស ១១នាក់ ដំបូងមានកម្រឹតខុសគ្នាឆ្ងាយពេក

ចែកចាយបន្ត

បន្ទាប់ពីដឹកនាំក្រុម Cambodian All Stars ទទួលបរាជ័យក្រោមថ្វីជើងក្រុម SCG​ Muangthong​ United ដោយលទ្ធផល ០ទល់៤ លោកគ្រូបង្វឹក Leonardo Vitorino បានលើកឡើងអំពីកីឡាករជម្រើស ១១នាក់ ដំបូងថាមកពីមានកម្រឹកសមត្ថភាពខុសគ្នាឆ្ងាយពេកទើបលេងមិនសូវត្រូវគ្នា ចាប់ផ្តើមបានតែ ២៥ នាទីគេទាត់ចូល ៣គ្រាប់ បាត់ទៅហើយ។

​គ្រូ​បង្វឹក​សញ្ជាតិ​ប្រេស៊ីល​​រូប​នេះ​ បាននិយាយក្រោយចប់ការប្រកួតកាលពីម្សិលមិញថា៖ «ដោយសារតែកីឡាករទាំងអស់លេងនៅក្លិបខុសគ្នា ដូច្នេះហើយការហ្វឹកហាត់នៅក្នុងក្រុមនីមួយៗក៏ខុសគ្នាដែរ ក្លិបខ្លះហាត់ ៣ថ្ងៃ ក្នុង ១សប្តាហ៍ ចំណែកខ្លះទៀតហាត់ ៤ថ្ងៃ ក្នុង ១សប្តាហ៍ អញ្ចឹងហើយបានជាកម្រឹតរបស់កីឡាករខុសប្លែកពីគ្នា នេះគឺជាកីឡាករដែលបង្ហាញខ្លួនជម្រើស ១១នាក់ ដំបូង តែនៅពេលដែល ផ្លាស់ប្តូកីឡាករ ១០រូប នៅនាទីទី ៣១ ឃើញថាមានការប្រែប្រួសភ្លាម ដោយសារតែកីឡាករដែលប្តូចូលមានកម្រឹតស្មើគ្នា»។ សូមបន្ថែមពីនេះថា កីឡាករដែលបង្ហាញខ្លួននៅវគ្គទី២ សុទ្ធសឹងតែជាយុវជនជម្រើសជាតិកម្ពុជាអាយុក្រោម ២៣ឆ្នាំ ដែលត្រៀមសម្រាប់ប្រកួតវគ្គ​​ជម្រុះ 2018 AFC U-23 Championship។

សូមរំលឹកផងដែរថា ការប្រកួតកាលពីម្សិលមិញនេះក្រុមរបស់ប្រទេសកម្ពុជា បានផ្លាស់ប្តូកីឡាកររហូតដល់ទៅ ១២រូប ពោលគីនៅនាទីទី ៣១ ប្តូកីឡាករ ១០រូប ចាប់ផ្តើមវគ្គទី២ ស៊ូ យ៉ាទី ប្តូចេញ និងពាក់កណ្តាលវគ្គទី២ កីឡាករ សឿត បារាំង ក៏បានប្តូចូលម្នាក់ទៀត៕