Post News Media ព័ត៌មានកីឡា លោក ពូទីន ស្ន...

លោក ពូទីន ស្នើឲ្យក្លិប Zenit ប្រើប្រាស់កីឡាករក្នុងស្រុក​ច្រើនជាងកីឡាករបរទេស

ចែកចាយបន្ត

លោក វ្លាឌីមៀ​ ពូទីន ប្រធានាធិបតីរុស្ស៊ី បានធ្វើសេចក្តីថ្លែង​ការណ៍មួយទៅកាន់ក្រុម Zenit St. Petersburg កាលពី​ម្សិលមិញនេះថា ក្លិបដ៍ធំនៅរុស្ស៊ីមួយនេះគួរតែ ដាក់កីឡាករក្នុងស្រុកឲ្យលេងច្រើនជាងដាក់កីឡាករបរទេសច្រើនបែបនេះ។

ប្រធានាធិបតីរុស្ស៊ី លោក វ្លាឌីមៀ ពូទីន បានធ្វើការក្រើនរំលឹកទៅដល់ក្លិបបាល់ទាត់នៅរុស្ស៊ី ឲ្យប្រើប្រាស់កីឡាករក្នុងស្រុកឲ្យបានច្រើន ដើម្បីពង្រឹង​សមត្ថភាព និងត្រៀមរើសកីឡាករល្អៗទាំងវ័យក្មេង និង​ជម្រើសជាតិស្រាប់ ត្រៀមធ្វើម្ចាស់ផ្ទះ FIFA World Cup ២០១៨​ នៅឆ្នាំក្រោយនេះ។ យ៉ាងណាវិញ ក្នុងសេចក្តីថ្លែងការណ៍មួយរបស់លោក ពូទីន ដែលត្រូវបានដកស្រង់ដោយ ESPN reports បានឲ្យដឹងថា ប្រធានាធិបតី ដ៍មានឥទ្ធិពលក្នុងពិភពលោក​រូបនេះ បានធ្វើការសង្កត់ធ្ងន់ទៅលើក្លិប Zenit St. Petersburg ដែលជាក្រុមមានតួនាទី នៅ ពានរង្វាន់អឺរ៉ុប ឲ្យពង្រឹងលើការដាក់កីឡាករក្នុងស្រុក លេងច្រើនជាងកីឡា​ករបរទេស។

លោក ពូទីន​ បានមើលឃើញពីកំហុសមួយ ដែលក្រុម Zenit St. Petersburg ​ បានយកឈ្នះ ៣-១ លើក្រុម Real Socieded របស់អេស្ប៉ាញ នៅពានរង្វាន់ Europa League នាពេលកន្លងមកថា ក្លិប Zenit St. Petersburg បានដាក់កីឡាកររុស្ស៊ី តែ៣នាក់ប៉ុណ្ណោះក្នុង​ទីលាន ខណ: អាហ្សង់ទីន មានដល់ទៅ៥រូប, ស្លូវេនៀ ១រូប, ស៊ែប៊ី ១រូប និងអ៊ីតាលី១រូប ដែលកីឡាករ Kokorin របស់រុស្ស៊ីអាចរកគ្រាប់បាល់បាន ២គ្រាប់ និងកីឡាករអាហ្សង់ទីន Emiliano Rigoni រកបាន១គ្រាប់។ តាមរយ:ហេតុផលនេះ លោក វ្លាឌីមៀ ពូទីន ចង់ឲ្យក្លិប Zenit ត្រូវតែពង្រឹងកីឡាករក្នុងស្រុកឲ្យ​មានកម្រិតលេងក្នុងទីលានឲ្យបានច្រើន ដើម្បីបណ្តុះពួកគេ​ឲ្យមានសមត្ថភាព យ៉ាងប្រសើរមួយ ដូចទៅហ្នឹងលីគធំៗ នៅអឺរ៉ុប ដែលព្យាយាមបណ្តុះកីឡាករក្មេងៗ ឲ្យមានភាព​ល្បីល្បាញ។

ដូច្នេះហើយ គំនិតរបស់លោក ពូទីន មិនមែនចង់ឲ្យក្លិបនៅរុស្ស៊ីឈប់ នាំយកកីឡាករបរទេសនោះឡើយ គ្រាន់តែលោកចង់ឲ្យក្លិប​នៅរុស្ស៊ីទាំងអ់ ជាពិសេសក្លិបធំៗ ព្យាយាមពង្រឹង និងការបង្កើនកីឡាករក្នុងស្រុកជំនាន់ក្រោយឲ្យមានឱកាសលេង ក្នុងទីលានឲ្យបានច្រើន ដើម្បីកសាងភាពល្បីល្បាញ ក្នុងពិភពបាល់ទាត់ ជាជាងការដុះខាត់កីឡាករបរទេស​ឲ្យល្បីល្បាញវិញនោះ។ ម្យ៉ាងវិញទៀត លោក ពូទីន ក៍ចង់ត្រៀមជ្រើសរើសកីឡាករល្អគ្រប់កម្រិត ដើម្បីត្រៀមធ្វើ ​ម្ចាស់ផ្ទះព្រឹត្តិការណ៍ FIFA World Cup នៅឆ្នាំក្រោយនេះ​ផងដែរ។