Post News Media ព័ត៌មានបច្ចេកវិទ្យា Qualcomm និង ...

Qualcomm និង Vivo បង្អួតបច្ចេកវិទ្យាស្កេនក្រយៅដៃក្រោមអេក្រង់ នៅ WMC សៀងហៃ!

ចែកចាយបន្ត

ក្រុមហ៊ុន Qualcomm បានបើកបង្ហាញនូវបច្ចេកវិទ្យាស្កេនក្រយៅដៃល្បឿនផ្លេកបន្ទោររបស់ខ្លួន ដែលអាចយកទៅច្របាច់បញ្ចូលក្រោមស្រទាប់កញ្ចក់អេក្រង់ទូរសព្ទដៃរបស់ក្រុមហ៊ុន Vivo នៅឯព្រឹត្តិការណ៍​​ World Mobile Congress ដែលកំពុងប្រារព្ធធ្វើឡើងពីថ្ងៃទី ២៨ ដល់ ៣០ ខែមិថុនា នាទីក្រុងសៀងហៃ ប្រទេសចិន។

នៅឯសមាជទូរសព្ទដៃពិភពលោករយ:ពេល ៣ ថ្ងៃនេះ ក្រុមហ៊ុនផលិតបន្ទះឈីបអាមេរិក បានលើកឡើងពីដំណោះស្រាយថ្មីជាមួយអង្គញាណ Fingerprint របស់ខ្លួន ដែលអាចយកទៅដាក់បញ្ចូលក្រោមអេក្រង់ប្រភេទ OLED ហើយអាចដំណើរការនៅក្នុងទឹក និងក្រោមសន្ទះលោហ:។

អំឡុងព្រឹត្តិការណ៍នោះដែរ ក្រុមហ៊ុនផលិតទូរសព្ទរបស់ចិន Vivo ក៏បានបង្ហាញស្មាតហ្វូនគំរូដែលមានបំពាក់មកជាមួយបច្ចេកវិទ្យាដ៏ទំនើបនេះនៅខាងក្រោមកញ្ចក់អេក្រង់។

រហូតមកទល់ពេលនេះ វត្តមានបន្ទះស្កេនក្រយៅដៃក្រោមកញ្ចក់អេក្រង់នៅលើទូរសព្ទលំដាប់កំពូលជំនាន់បន្ទាប់ របស់ក្រុមហ៊ុន Samsung និង Apple ពោលគឺ Galaxy Note 8 និង iPhone 8 ដែលត្រូវគេរំពឹងថា នឹងមកដល់ក្នុងខែសីហា និងកញ្ញា ខាងមុខ នៅតែឋិតនៅភាពស្រពិចស្រពិលនៅឡើយ។

យោងតាមព័ត៌មានចចាមអារ៉ាមចុងក្រោយ ក្រុមហ៊ុនបច្ចេកវិទ្យាយក្សអាមេរិក និងកូរ៉េ កំពុងជួបបញ្ហាក្នុងការច្របាច់បញ្ចូលបន្ទះស្កេនថ្មី ក្រោមកញ្ចក់អេក្រង់ទូរសព្ទស៊េរីបន្ទាប់របស់ពួកគេ ដែលនាំឱ្យក្រុមហ៊ុនទាំងពីរនឹងត្រូេះបង្ខំចិត្តយកវាទៅដាក់នៅខាងក្រោយខ្នងទូរសព្ទជំនួសវិញ។

អង្គញាណស្កេនក្រយៅដៃរបស់ក្រុមហ៊ុន Qualcomm ជំនាន់ចុងក្រោយនេះ គឺអាចគាំទ្រជាមួយបន្ទះឈីប Snapdragon 660 និង 630 ហើយវានឹងបញ្ចូនចូលរោងចក្រផលិតនៅក្នុងខែនេះ រួចនឹងទាញយកផលចំណេញនៅឆមាសទីមួយឆ្នាំបន្ទាប់។

កាលពីថ្ងៃពុធ ក្រុមហ៊ុនបាននិយាយថា អង្គញាណស្កេនក្រយៅដៃថ្មីនេះ ត្រូវបានបង្កើតឡើងដើម្បីឆ្លើយតបទៅនឹងកញ្ចក់អេក្រង់គ្មានស៊ុមរបស់ក្រុមហ៊ុនឧស្សាហកម្មស្មាតហ្វូនផ្សេងៗដែលកំពុងវិវឌ្ឍទៅមុខ ជាមួយសមត្ថភាពការពារជម្រាបទឹកដ៏អស្ចារ្យ៕

ប្រភពព័ត៌មាន: zdnet