Post News Media ព័ត៌មានបច្ចេកវិទ្យា iPhone 8 Plus...

iPhone 8 Plus ជួបបញ្ហាថ្មប៉ោង លេចឡើងកាន់តែច្រើន

ចែកចាយបន្ត

បន្ទាប់ពីទូរសព្ទ iPhone 8 Plus ជួបបញ្ហាហើបសម្បកឡើងដោយសារតែបញ្ហាថ្មប៉ោង ដែលត្រូវគេរាយការណ៍ថា បានកើតមាននៅក្នុងប្រទេសជប៉ុនមួយករណី និងនៅតៃវ៉ាន់មួយករណី កាលពីដើមសប្តាហ៍រួចមក ព័ត៌មានដែលមិនធ្លាប់កើតមាននៅលើទូរសព្ទ iPhone នេះ គឺមិនទាន់ស្ងប់រលត់បាត់នៅឡើយទេ។

នៅពីរបីថ្ងៃចុងក្រោយនេះ ក្នុងប្រទេសកាណាដា ចិន គ្រិច និងហុងកុង ក៏មានម្ចាស់ទូរសព្ទ iPhone 8 Plus ត្រូវគេរាយការណ៍ថា បានជួបបញ្ហាស្រដៀងគ្នានេះដែរ។ ក្រៅពីនោះ ក៏មានដែរអ្នកលើកឡើងពីឧប្បត្តិហេតុ iPhone 8 Plus របើកសម្បកដោយឯកឯងរាយការណ៍មកកាន់គេហទំព័រ Mashable និងលើបណ្តាញសង្គមប្លុក Reddit ដែលរហូតមកទល់ពេលនេះ​ សរុបមាន ៩ ករណីហើយ។

លោក Chris Ogden រស់នៅក្នុងសង្កាត់ ក្រុងញូវយ៉ក បានប្រាប់ Mashable ថា គាត់បានប្រើ iPhone 8 Plus ពណ៌ទឹកប្រាក់ ទំហំ ២៥៦ GB បានមួយសប្តាហ៍ ក៏ចាប់អារម្មណ៍ឃើញថា តួទូរសព្ទរបស់គាត់ផ្នែកខាងមុខ និងខាងក្រោយហើបឡើង​ចេញពីគ្នាតែម្តង។ គាត់បានបន្ថែមថា មុននឹងជួបបញ្ហាដូច្នោះ គាត់បាន​សាកថ្មទូរសព្ទរបស់គាត់ ដោយប្រើឆ្នាំងសាកឥតខ្សែ Anker Qi ដាក់នៅលើតុ ព្រមជាមួយការប្រើខ្សែ​ដោត Lighting ពី Apple ពីរបីដង។

លោក Ogden បានយកទូរសព្ទរបស់ខ្លួនទៅឱ្យបុគ្គលិកនៅហាង Apple ពិនិត្យមើល និងប្តូរថ្មីដោយមិនគិតថ្លៃ។ បុគ្គលិកហាងបានប្រាប់គាត់ថា ពួកគេបានផ្ញើទូរសព្ទខូចនោះទៅឱ្យក្រុមហ៊ុនឆែកមើលហើយ។

អ្នកប្រើប្រាស់ម្នាក់ផ្សេងទៀតឈ្មោះ Itsrishabh បានអះអាងតាមបណ្តាញសង្គម Reddit ថា​ iPhon 8 Plus របស់គាត់ហើបសម្បកផ្នែកខាងក្រោយចេញពីអេក្រង់ចាប់តាំងពីនៅក្នុងប្រអប់មកម្លេះ ដែលនេះ គឺដូចទៅនឹងរបាយការណ៍មួយចំនួនផ្សេងទៀតពីមុនអីចឹងដែរ។

ទោះយ៉ាងណាអ្នកប្រើប្រាស់ Reddit រូបនោះ មិនបានផ្តល់ព័ត៌មានលម្អិតទាក់ទងទៅនឹងករណីដែលខ្លួនបានជួបប្រទះនោះទេ។

អ្នកនាំពាក្យរបស់ក្រុមហ៊ុន Apple ម្នាក់ បានប្រាប់ Mashable ថា ពួកគេកំពុង​ស៊ើបអង្កេតរកមូលហេតុដែលបង្កឱ្យកើតមានករណីថ្ម iPhone ទាំងអម្បាលមានហើបប៉ោងឡើង ប៉ុន្តែ បានបដិសេធមិនផ្តល់ការអធិប្បាយអ្វីបន្ថែម៕