Post News Media ព័ត៌មានបច្ចេកវិទ្យា Apple ត្រូវគេ...

Apple ត្រូវគេរាយការណ៍ថា នឹងចាប់ដៃជាមួយ LG ផលិតអេក្រង់បត់សម្រាប់ iPhone ជំនាន់ក្រោយ

ចែកចាយបន្ត

ថ្មីៗនេះ ក្រុមហ៊ុន Samsung ត្រូវគេប៉ាន់ប្រមាណថា នឹងអាចរកចំណូលបានពីការផ្គត់ផ្គងអេក្រង់ Super OLED ទៅឱ្យក្រុមហ៊ុន Apple បំពាក់លើទូរសព្ទដៃ iPhone X (Ten) ប្រមាណជាង ៤ ពាន់លានដុល្លារ ខណ:ខ្លួនឈានមុខគេក្នុងទីផ្សារអេក្រង់ឧបករណ៍ចល័តប្រភេទនេះ។

ប៉ុន្តែ សម្រាប់កញ្ចក់អេក្រង់ប្រភេទអាចបត់ចុះឡើងបានវិញ Samsung ពុំទាន់ មានប្រៀបលើក្រុមហ៊ុន LG នៅឡើយទេ។ ពោលគឺ ក្រុមហ៊ុនគូប្រជែងរួមជាតិមួយនេះ មានសក្តានុពលខ្លាំងជាងក្នុងការទាក់ទាញក្រុមហ៊ុន Apple ឱ្យជ្រើស​យកធ្វើជាដៃគូ ក្នុងការផលិតចេញអេក្រង់បត់បាន សម្រាប់ស្មាតហ្វូនអនាគតរបស់ខ្លួន។
យោងតាមរបាយការណ៍ថ្មីមួយពីគេហទំព័រ The Investor ក្រុមហ៊ុន Apple អាចនឹងប្រើប្រាស់កញ្ចក់អេក្រង់ប្រភេទអាចបត់ចុះឡើងបាន ដែលផ្គត់ផ្គង់ដោយក្រុមហ៊ុន LG Display សម្រាប់ iPhone ជំនាន់ក្រោយ។

ដោយឡែក ក្រុមហ៊ុនបុត្រសម្ព័ន្ធរបស់ LG ឈ្មោះ Innotek ត្រូវគេអះអាងថា ក៏កំពុងបង្កើនល្បឿនក្នុងការផលិតបន្ទះស្គៀគ្វីអាចបត់បានសម្រាប់បំពាក់ឱ្យទូរសព្ទចល័តផងដែរ។

ប្រភពដដែលបន្ថែមថា ក្រុមហ៊ុនបច្ចេកវិទ្យាអាមេរិក អាចនឹងធ្វើការបើកបង្ហាញ​ស្មាតហ្វូនបំពាក់អេក្រង់បត់ពីក្រុមហ៊ុន LG Display ក្នុងឆ្នាំ ២០២០។

របាយការណ៍ថ្មីនេះដែរ គឺធ្វើឡើងក្រោយពីព័ត៌មានចចាមអារ៉ាមជាច្រើនលើកឡើងកាលពីខែកក្កដាថា Apple អាចបោះទុនវិនិយោគចំនួន ២.៦ ពាន់លានដុល្លារ សម្រាប់ទ្រទ្រង់រោងចក្រផលិតអេក្រង់ OLED ថ្មីរបស់ LG។

គួររំឭកថា កន្លងមក Samsung និង LG ក៏ត្រូវគេរាយការណ៍ថា នឹងបញ្ចេញស្មាត​ហ្វូនបំពាក់អេក្រង់បត់ឆាប់ៗខាងមុខផងដែរ ហើយបើតាមការប៉ាន់ស្មាន វាអាចនឹងលេចចេញជារូបរាងក្នុងឆ្នាំ ២០១៨ ខាងមុខនេះតែម្តង៕

ប្រភពព័ត៌មាន: Android Authority