Post News Media ព័ត៌មានអន្តរជាតិ អាមេរិក ដាក់ស...

អាមេរិក ដាក់សម្ពាធឲ្យចិន ចាត់វិធានការបន្ថែមទៀត ដើម្បីទប់ស្កាត់កូរ៉េខាងជើង

ចែកចាយបន្ត

អាមេរិក: រដ្ឋាភិបាលក្រុងវ៉ាស៊ីនតោន បានជំរុញឲ្យចិនដាក់សម្ពាធសេដ្ឋកិច្ច និងការទូតបន្ថែមទៀត ទៅលើកូរ៉េខាងជើង ដើម្បីទប់ស្កាត់កម្មវិធីនុយក្លេអ៊ែរ និងមីស៊ីលរបស់ប្រទេសនេះ ក្នុងអំឡុងពេលកិច្ចចរចាកម្រិតខ្ពស់មួយ នៅទីក្រុងវ៉ាស៊ីនតោន។ នេះបើយោងតាមសារព័ត៌មាន aljazeera ចេញផ្សាយនៅថ្ងៃទី២២ ខែមិថុនា ឆ្នាំ២០១៧។

ជំនួបរវាងអ្នកការទូតចិន និងប្រមុខការពារជាតិអាមេរិក ត្រូវបានធ្វើឡើងកាលពីថ្ងៃពុធ បន្ទាប់ពីប្រធានាធិបតី លោក ដូណាល់ ត្រាំ បាននិយាយថា កិច្ចខិតខំប្រឹងប្រែងរបស់ចិន ក្នុងការប្រើអានុភាពរបស់ខ្លួន ជាមួយក្រុងព្យុងយ៉ាង ត្រូវបានបរាជ័យ ដែលជាហេតុធ្វើឲ្យមានការសង្ស័យថ្មីៗ អំពីយុទ្ធសាស្រ្តរបស់លោក ក្នុងការទប់ទល់នឹងការគំរាមកំហែងពីសំណាក់រដ្ឋាភិបាលក្រុងព្យុងយ៉ាង។

រដ្ឋមន្ត្រីការបរទេសអាមេរិក លោក Rex Tillerson បានប្រាប់អ្នកសារព័ត៌មាន នៅឯសន្និសីទសារព័ត៌មានរួមគ្នាមួយ ជាមួយរដ្ឋមន្ត្រីការពារជាតិ លោក Jim Mattis ថា «យើងបានអះអាងជាថ្មីម្តងទៀត ចំពោះប្រទេសចិនថា ពួកគេមានការទទួលខុសត្រូវ ខាងការទូតដើម្បីដាក់សម្ពាធសេដ្ឋកិច្ច និងការទូតដ៏ធំធេងលើរបបមួយនេះ ប្រសិនបើពួកគេចង់ទប់ស្កាត់ការប្រឈមមុខផ្នែកអាវុធ និងភាពតានតឹងនៅក្នុងតំបន់»។

ក្នុងនោះដែរ លោក Mattis បានប្តេជ្ញាថា «នឹងបន្តចាត់វិធានការចាំបាច់ ដើម្បីការពារខ្លួនយើង និងសម្ព័ន្ធមិត្តរបស់យើង ក្នុងការប្រឆាំងនឹងកូរ៉េខាងជើង ដែលកំពុងដំណើរការអភិវឌ្ឍកម្មវិធីមីស៊ីល បំពាក់ជាមួយក្បាលគ្រាប់បែកនុយក្លេអ៊ែរ ដែលមានសមត្ថភាព អាចវាយប្រហារដល់សហរដ្ឋអាមេរិក»៕