Post News Media ព័ត៌មានសិល្បៈ និងកម្សាន្ត គង់ សុជាតិ សម...

គង់ សុជាតិ សម្ពោធហាងថ្មី តម្លៃជិត២លានដុល្លារ

ចែកចាយបន្ត

នៅព្រឹកថ្ងៃទី១៣ សីហា ពិធីការិនីល្បីឈ្មោះ អ្នកនាងគង់ សុជាតិ បានបើកសម្ពោធអាគារសាឡន របស់ខ្លួនយ៉ាងអធឹកអធម បើទោះជាពិធីប្រកាសហាងថ្មីនោះ មិនបានអញ្ចើញតារាសិល្ប:ឲ្យចូលរួមកុះករ។

ហាងថ្មីរបស់អ្នកនាង ត្រូវបានសាងសង់ជាអាគារច្រើនជាន់ នៅកណ្ដាលទីប្រជុំក្នុងតំបន់ទួលគោក នៅម្ដុំសាកលវិទ្យាល័យវេស្ទើនផ្សារ TK ដោយអ្នកនាងបង្ហើបថា សរុបទាំងថ្លៃដី និងការសាងសង់ គឺអស់ជិត២លានដុល្លារទៅហើយ ដោយមិនទាន់រាប់បញ្ចូលការបំពាក់សម្ភារ: និងការតាក់តែងដេគ័រនៅជាន់ខាងលើៗផង។

អ្នកនាងគង់ សុជាតិ និយាយថាក្រោយការប្រកាសបើកទីតាំងសាឡនថ្មី នៅតំបន់ទួលគោល អ្នកនាងនឹងសម្រេចបិទចោលទីតាំង នៅម្ដុំខាងមុខវិទ្យាល័យបាក់ទូកហើយ ដោយសារតែទីតាំងនោះពិបាកចតរថយន្ត និងចំណាយថ្លៃជួលអស់ច្រើន។ អ្នកនាងថាទីតាំងដែលទើបបើកសម្ពោធ និងកាត់ខ្សែបូរនេះ គឺជាអាគារផ្ទាល់ខ្លួន ដោយអ្នកនាង និងគ្រួសារបានចំណាយលុយទិញដី និងបោះទុនសង់ជាអាគារខ្ពស់តែម្ដង ដើម្បីឲ្យមានកន្លែងចតរថយន្តក្រោមដី មានហាងលក់គ្រឿងសម្អាងស្ដង់ដា មានហាងសាឡនធំ មានកន្លែងបង្ហាត់បង្រៀនសិស្ស និងមានកន្លែងឲ្យសិស្សឆ្ងាយៗស្នាក់នៅ។

ហាងថ្មីមួយនេះ អ្នកនាងថាចំណាយអស់ជិត២លានដុល្លារហើយ បើបូករួមទាំងដី ដោយចំនួនដ៏លើសលប់នេះ គឺមិនទាន់រួចរាល់ទាំងស្រុងផង។ អ្នកនាងនិយាយថា សម្អាងលើម្ដាយរបស់អ្នកនាង មានដីធ្លីល្អៗ លក់ដូរទើបហាងថ្មីនេះ បានលេចរូបរាង ក្នុងពេលដែលអ្នកនាងបញ្ជាក់ថា ម្ដាយរបស់ខ្លួន ក្រោយការប្រមូលលុយយកចាត់ចែង ក្នុងការសង់ហាងនេះហើយ ក៏នៅមានវីឡាជួលនៅបុរីប៉េងហួត៤កន្លែង និងដីច្រើនកន្លែងទៀត ដោយទឹកប្រាក់ជាចំណែករបស់អ្នកនាង និងប្អូនៗគឺមិនមានចំនួនច្រើនទេ។

អ្នកនាងថាបើកុំតែម្ដាយមានដីដោះដូរ គឺមិនអាចទិញដីបានចំប្លង់ និងសាងសង់បាននូវអាគារកម្ពស់ច្រើនជាន់ អស់ប្រាក់ដល់ជិត២លានដុល្លារកើតទេ ដោយសារតែផលចំណេញដែលបានទទួលពីការបើកហាងសាឡនកន្លងមក បើទោះចំណេញកប់ក្ដោង ក៏មិនអាចសល់ប្រាក់ដល់លានដុល្លារ ដើម្បីទិញដីធ្វើហាងធំដែរ។ អ្នកនាងថាចំនួនទឹកប្រាក់ដ៏លើសលប់នេះ នៅមិនទាន់រាប់បញ្ចូលការថែមថយនូវជាន់ខាងលើដែលមិនទាន់រួច និងត្រូវបំពាក់សម្ភារ:ក្នុងហាងនោះផង។

ជាមួយនឹងការប្រកាសហាងថ្មី ដែលមានដើមទុនដល់ជិត២លានដុល្លារនេះ ធ្វើឲ្យម្នាក់ៗមានការកោតសរសើរ ចំពោះអ្នកនាងគង់ សុជាតិ យ៉ាងខ្លាំង ដែលមានលទ្ធភាពដំណើរការមុខជំនួញជាទ្រង់ទ្រាយធំមិនចាញ់សេដ្ឋីនី ខុសពីមុខជំនួញរបស់តារាសិល្ប:មួយចំនួន។ អ្នកនាងប្រកាសថា សប្បាយចិត្តដែលមានទីតាំងហាងផ្ទាល់ខ្លួន ដោយឈប់ជួលដូចមុន ហើយបើទោះជាបានចំណាយអស់ប្រាក់ច្រើនមែន តែអ្នកនាងបញ្ជាក់ថា គឺចំណាយតែម្ដងហើយរង់ចាំកើបលុយតែម្ដង គឺមិនខុសទីតាំងហាងចាស់ ដែលគ្រាន់តែបង់ថ្លៃផ្ទះ គឺរាប់ពាន់ដុល្លារនោះទេ។ អ្នកនាងថាហាងសាឡនរបស់ខ្លួនក្រៅពីមានស្ដង់ដារជាអាជីវកម្មធំដុំ ក៏ស្ថិតក្នុងទីប្រជុំជនធំ ក្នុងតំបន់ទួលគោក ដែលមានភាពងាយស្រួល ក្នុងការប្រកបជំនួញ។ អ្នកនាងប្រកាសថា បើទោះជាមានពិធីសម្ពោធជាលក្ខណ:គ្រួសារដែលធំដុំ កាលពីព្រឹកថ្ងៃទី១៣ សីហានោះក៏ពិតមែន តែពិធីជប់លៀងសម្ពោធធំដុំ ដែលត្រូវអញ្ជើញតារាសិល្ប:ឲ្យចូលរួម ក៏នឹងត្រូវធ្វើឡើងផងដែរ ក្រោយហាងមួយនេះដំណើរការបានស្រួល ហើយត្រូវចំពេលអ្នកនាង និងគ្រួសារមានពេលរៀបចំ៕