រាជធានីភ្នំពេញ÷ ឃាតករម្នាក់ដែលបានខ្ទប់ដង្ហើមសម្លាប់ស្ត្រីម្នាក់! បន្ទាប់ពីរួមភេទហើយនៅផ្ទះសំណាក់យីហោ: គ្រួសារ ។ ពេលនេះត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការនគរបាល រាជធានីភ្នំពេញ សហការជាមួយ អធិការដ្ឋាននគរបាលខណ្ឌមានជ័យ និងអធិការដ្ឋាននគរបាលស្រុកស៊ីធរកណ្ដាល ខេត្តព្រៃវែង បានធ្វើការស្រាវជ្រាវឃាត់ខ្លួនបានកាលពីរសៀល ថ្ងៃទី២០ ខែកក្កដា ឆ្នាំ២០២៦ នៅចំណុចផ្លូវលំ មុខឃ្លាំងដាក់ឡាន VTS ក្នុងភូមិគោកចំបក់ សង្កាត់ចោមចៅ១ ខណ្ឌពោធិនសែនជ័យ ។
ករណី:(ឃាតកម្ម) ខាងលើនេះបានកើតឡើងកាលពី វេលាម៉ោង១៧:២០នាទីល្ងាច ថ្ងៃទី១៧ ខែកក្កដា ឆ្នាំ២០២៦ ស្ថិតនៅចំណុចផ្ទះសំណាក់យីហោ: គ្រួសារ បន្ទប់២០៤ ជាន់ទី១ ភូមិទ្រា១ សង្កាត់មានស្ទឹងមានជ័យ១ ខណ្ឌមានជ័យ រាជធានីភ្នំពេញ ។ បណ្តាលឲ្យ មានការភ្ញាក់ផ្អើលនៅវេលាថ្ងៃត្រង់ ថ្ងៃទី១៨ ខែកក្កដា ឆ្នាំ២០២៦។
ជនសង្ស័យជាឃាតករ រូបនេះ ឈ្មោះ យ៉ង ស៊ាងខៃ ហៅ(ខុម )ភេទប្រុស អាយុ២៦ឆ្នាំ ។ចំណែកជនរងគ្រោះ ឈ្មោះ ឃឿន ផលឡៃ ភេទស្រី អាយុ២០ឆ្នាំ ទីលំនៅភូមិសន្ទិចលិច ឃុំដងកា ស្រុកស្ទឹងត្រង់ ខេត្តកំពង់ចាម។
តាមពត៌មានពី បុគ្គលិកផ្ទះសំណាក់បានឲ្យដឹងថា: នៅវេលាម៉ោងប្រហែល៣រសៀល ថ្ងៃទី១៧ ខែកក្កដា ឆ្នាំ២០២៦ បុរសម្នាក់បានជិះម៉ូតូ០១គ្រឿង ម៉ាកHonda Beat ពណ៌ខៀវ មិនចាំស្លាកលេខ ដឹកជនរងគ្រោះមកផ្ទះសំណាក់ ហើយជួលបន្ទប់ដេកមួយយប់ ។ លុះនៅវេលាម៉ោងប្រហែល១២:០០នាទី ថ្ងៃទី១៨ ខែកក្កដា ឆ្នាំ២០២៦ បុគ្គលិកផ្ទះសំណាក់ ក៏បានបើកទ្វារសំអាតបន្ទប់ ស្រាប់តែឃើញជនរងគ្រោះ(ស្លាប់) នៅលើឥដ្ឋការ៉ូជាប់គ្រែ រួចក៏ប្រាប់ម្ចាស់ផ្ទះសំណាក់រាយការណ៍ទៅសមត្ថកិច្ចតែម្តង។
តាមការត្រួតពិនិត្យ លោក ឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា :ជនរងគ្រោះ ស្លាប់ដោយស្ទះដង្ហើម (ឃាតកម្ម ខ្ទប់ច្រមុះ មាត់)។ សូមបញ្ជាក់ថា: បន្ទាប់ពីមានករណីឃាតកម្ម ខាងលើនេះកម្លាំងនគរបាលព្រហ្មទណ្ឌកំរិតស្រាលបានធ្វើការស្រាវជ្រាវបានតែ០២ថ្ងៃ ប៉ុណ្ណោះ! ហើយឈានទៅឃាត់ខ្លួនឃាតករតែម្តង។
មូលហេតុយ៉ាងណា ពុំទាន់ដឹងថា:ជនដៃដល់មានគំនុំអ្វី? ជាមួយជនរងគ្រោះឡើយទេ ដោយឃាតកររូបនោះពុំទាន់សារភាពនៅឡើយ!!! ៕
